2459/2025-2026

Aizawl the 17th September, 2025 : Vawiin khan ni hnih chhung awh tur Workshop on World of Work (WoW) chu PM Shri school, MICE ah neih a ni a. A programme hawnna inkhawm hi Pu Lalrinkima, Principal, MICE in a kaihruai a, Pi Caroline Zoramthangi, Director, SCERT chu khuallian a ni. He World of Work (WoW)  hmalakna hi thil chhinchhiah tlak tak niin, NEP 2020 thil tum tihhlawhtlinna kawnga hmalakna pawimawh tak a ni. Pawl 9 leh pawl 10 zirlaite chu skill development leh vocational education lama hmasawnna an neih theihna atan he programme hi buatsaih a ni a. State leh UT zawng zawnga hmalakna kalpui vek tura ruahmanna siam a ni.

He workshop hian a tum ber chu zirlaite hnena traditional leh non-traditional Career Path kawhhmuh te, Ministry of Skill Development hnuaia job sector 36 awm kawhhmuh te, tunlai khawvel thang chho meka Artificial Intelligence (AI) tangkaina hriattir te a ni. He mi bakah hian sorkar laipui hmathlir ‘Mend the Skill of India’ in a tum, naupangte an lo puitlin huna hna thawk thei tura chher hriam chu he programme hian a tum ber a ni. He workshop chhung hian naupangte chu a tam thei ang ber interactive discussion neihpui te, group work  leh role play hmangtea Career chi hrang hrang hmelhriattir a ni a. Khuallian, Pi Caroline Zoramthangi, Director, SCERT chuan zirlaite chu he hun tha hi bawh pelh lo tur leh a tam thei ang ber zawhnate zawt a, hmang tangkai turin a fuih a. Naupangte chu tun atanga kum 8-ah chuan an nih tur ang an nih tawh dawn avangin, he ni hnih chhung hian an talent leh tui zawngte haichhuah a nih ngei theih nan duhsakna a hlan.

He Workshop-ah hian NCERT, Delhi atangin Resource Person pahnih an lo kal a, Prof. Indrani Bhaduri, Head and CEO, PARAKH, NCERT chuan online hmangin naupangte hi hun an hmanpui bawk a ni.