No.1295/2021-2022

Dated Serchhip, the 8th July, 2021: Vawiin hian DC Meeting Hall Serchhip ah Deputy Commissioner Office hmalakna a Serchhip District chhunga sawrkar School te ti hmasawna, zirlai naupang an neih tam theihna tura hmalakna, ‘School Chhawm rawh’ (Adopt a School) hnuaia School chhawm pali (4) te hnenah Water Filter sem a ni.

He hunah hian Pu Kumar Abhishek, IAS District Bawrhsap chuan School chhawm ten Water Filter an dawn theihna tura hma latu Pi Neetisha Verma, IRS, Deputy Commissioner, Custom Department, Aizawl Division leh a thawhpui te chungah lawmthu a sawi a, anni hian heng filter te hi an thawh anih thu a tarlang a. ‘Adopt a School’ kalpui meka Nodal Officer ruat theuh te chu an School te tana an mawmawh tur zawt kualin zirlaiten tui thianghlim an in theihna tur Water Filter chu an mamawh te zing ami anih angin Adopted School 4 te hnenah hian Water Filter hi pek an ni ta a ni, a ti. Nodal Officer te chu an School enkawl theuh tana tangkai leh an mamawh an hmuh theihna hnar lo dap chhunzawm zel tura ngenin, theihtawp a bawhzui zel anih tur thu a hrilh a ni. Adopted School (School chhawm) te tana thilpek pe duh mimal leh Company an awm anih chuan engtik lai pawh a an inhawn reng thu a sawi bawk. Tin, Pu Vanlalhmachhuana, BDO Serchhip, Khumtung Govt. Primary School Nodal Officer hmalaknaa PHE Department ten school tana inthiarna an buatsaih sak thu leh Water Filter hi BDO Office in an lo pek tawh thu tarlangin lawmthu a sawi a ni.

Adopted School te tana Water Filter petu Pi Neetisha Verma, IRS, Deputy Commissioner, Custom Department, Aizawl Division pawhin thusawiin, sawrkar zirna in tih changtlun nana Serchhip Bawrhsap hmalaknaa ‘Adopt a School’ kalpui a ni chu lawmawm a tih thu a sawiin, mihring puitlinna kalkawnga kailawn pawimawh ber pakhat chu zirna school nia a hriat thu a sawi a, naupang ten zirna a hlawhtlinna an hmuh theihna tur chuan an hriselna a pawimawh a, hriselna atan tui thianghlim hnianghnar a tul hle bawk a chuvang chuan Serchhip District chhunga Adopted School te tan an theih angin Water Filter hi an ngaihtuah sak thu a tarlang a ni.

He hunah hian Pi Zohmangaihi, DEO Serchhip pawhin thu sawiin zirna tih hmasawn duhtu Serchhip District in Bawrhsap a nei chu lawmawm a tih thu a sawi a, Academic Session liam ta atanga Adopt a School kalpui anih hnu ah hun hmasa lam aiin Adopted School hrang hrang ah zirlai inziaklut an pung tih a sawi a ni.

Adopt a School Programme hnuaia School thlanchhuah te tan hian Water Filter 14 semchhuah niin Govt. M/S-I Bungtlang leh Govt. P/S-II East Lungdar te hnenah pali (4) ve ve pek niin Govt. M/S Khumtung leh Govt. H/S Thenzawl te hnenah pathum (3) ve ve pek an ni.

District bawrhsap bul tuma Serchhip District chhunga sawrkar School te ti hmasawna zirlai naupang an neih tam theihna tura hmalakna, ‘School Chhawm rawh’ (Adopt a School) hi kumin January 27 khan a hawnna neih a lo ni tawh a, he hmalakna kalpuina tur hian a tirah Serchhip District chhunga zirna In 5 thlanchhuah niin a hnuah School dang pakhat chu chhawm tura lak leh a ni a. Heng School tinah hian DC Office-a Officer te chu Nodal Officer atan ruat theuh an ni.