No.1294/2021-2022

Vawiin khan AH & Vety Minister Dr. K.Beichhua kaihhruai Consultative Committee Meeting on African Swine Fever chu SAD Conference Hall, MINECO-ah neih a ni a. Meeting-ah hian member MLA te Er. H.Lalzirliana, Dr. K.Pachhunga, Pu Lalduhoma, Pu K.T Rokhaw bakah sawmbik Pu C.Lalmuanpuia leh midangte an tel a ni.

Meeting-ah hian tun hnaia vawk natna African Swine Fever (ASF) avanga vanduaithlak taka vawk thi chungchanga eizawn nana hmang, vawk vulhtute hnena zangnadawmna pek theih dantur sawiho a ni a. Department hriatpuinaa vawk suat (culled) avanga zangnadawmna chu central sawrkar-ah scheme awmsa a nih angin dil ni se tih rel a ni a. Scheme awmsa-ah hian category panga a awm a; chungte chu- kg 15 chin hnuai lamah Rs 2200, kg 15 atang kg 40 inkar Rs 5800, kg 40 atanga 70 inkar Rs 8400, kg 70 atanga kg 100 inkar Rs 12000, kg 100 chin chunglamah Rs 15000 a zangnadawmna (compensation) hi then hrang a ni, central:state share hi 50:50 a ni bawk a ni. Vawkhri ASF avanga thi, suat ni lo te pawh record fel fai taka kalpui a ni a, vawk vulhtute hming, leh Adhaar number bakah, thi zat te ziaka dah zel a ni bawk a ni. DM&R te nen inrawn zelin ASF avanga thi, suat (culled) ni lo te pawh zangnadawmna pek an nih theih nan a theih angin hmalak zel ni se tih pawm tlang a ni a.

Livestock Insurance chungchang pawh sawi ho nii, a theih angin leh a tul angin member ten hmalak ni se tih rel a ni a, Mizoram chunga ranvulh dan mumal tak, a vulhtute tih tur leh tihloh tur bakah registration rules te mamawh a nih chhoh tak avangin, dan siam (legislate) tura bawhzui ni bawk se tih pawm tlan a ni bawk a.

Minister Dr. Beichhua chuan ASF avanga vanduaina tawk vawkvulh chungkua te a tawrhpui zia sawiin, ei leh bar eizawnna tam tak a ti khaihlak thei a ni, a ti a. Vawk thi sawngbawl kawngah magistrate, police, pawl hrang hrang NGO ten lungrual taka hma an la thin chu lawmawm a tih thu a sawi a ni.

Mizoram ah March ni 21, 2021 khan Lungsen khua-ah vawk a thi tan a, vawk hri state in a lo hmachhawn fo tawh thin CSF leh PRRS a ni lo tih rang takin laboratory-ah finfiah nghal a ni a. April ni 5, 2021-ah Special Disease Investigation Team Lungsen khua-ah tirh a ni a, April ni 16, 2021 ah ASF finfiah a ni a. March ni 21, 2021 atanga vawiin thleng a ASF avanga vawk thi hi 10258 a ni a, district 11 ah hri leng mek in kaw/veng 163-ah ASF hi finfiah tawh a ni. Hei bakah hian ASF ni a rinhlelh la finfiah loh vawk thi 662, khua/veng 88-ah a awm tawh bawk a ni. ASF hri kai tawh vawk 1230 suat (culled) tawh a ni bawk a. ASF kaihhnawiha vawiin ni thlenga vawk thi tawh zawng zawng chu 12,160 a ni. Vawk thi avanga economic loss hi Rs 117 crore (conservative estimate) chuanga chhut a ni. ASF awareness campaign hmun hrang hrangah vawi 201 buatsaih tawh a ni a ni. ASF vector zingah tho (common fly), mihring an tel a ni.