Vawiin chawhma dar 10:30 khan Directorate of School Education Conference Hall, Mc Donald Hill-ah ‘Unified District Information System for Education (U-DISE) Day’ hman a ni a, hemi rual hian October ni 1-16 chhunga neih tur ‘U-DISE Fortnight’ kick off neih nghal a ni. U-DISE Fortnight kick off hi Pu K. Lalthawmmawia, Director of School Education-in a nei a ni.

Pu K. Lalthawmmawia chuan zirna lama kan dinhmun dik tak hriat theih nan kar hnih chhung hun hman anih tur thu leh School Education-ah chuan U-DISE hmanga data dik tak neih a ngai a, hei hi plan leh budget innghahna tur a nih avangin mawhphurtuten mahni zawn theuhah tanlak a ngaih thu a sawi a. He thil hi Central-ah la submit tur a niin, a dik lo lakkhawm chuan hma lam hun lo kal zel tura thil pawi tak thlen thei a nih avangin U-DISE hi a hun takah sawrkar laipuia theh luh a nih ngei theih nan mawhphurtu zawng zawngte theihtawp chhuah turin a chah a ni.

Unified District Information System for Education (U-DISE ) hi School zawng zawng, Primary School atanga Higher Secondary School zawng zawng chanchin lak khawmna, School Education Statistics a ni a, National University of Educational Planning and Administration (NUEPA) kal tlanga Govt. of India hma lakna niin India ram pumah hman a ni a. School Education Department hnuaia awm Directorate, SSA, RMSA leh Mid-Day Meal-ten data chi hrang hrang an nei hi sawrkarin tha a ti lova, kum 2014 atangin U-DISE hi School Education Department leh a hnuaia awm – Directorate, SSA, RMSA leh Mid-Day Meal-te nen tang tlanga lakkhawm leh hman tan a ni ta a ni. Kum tin September ni 30-a school zawng zawng (Private school pawh huam vekin) dinhmun kimchang hriatna tur a nih avangin kuminah pawh hian October ni 1 atanga ni 16 chhungin he information lak khawm hnathawh runpui hi tan tur a ni. Hetah hian CRC Coordinator-te leh School tin Principal leh Headmaster-te an pawimawh hle dawn a, Data dik leh rintlak tak a awm theih nan a mawhphurtu zawng zawngin he U-DISE FORTNIGHT hi ngai pawimawh tur leh information dik tak la tur leh pe turin Department hotute chuan an ngen. He information lak khawm hi NGO-te pawhin an lo pawmpuia, a dik a ni tih an nemngheh a ngaih avangin, tlawmngai pawl hruaitu zawng zawng pawh Department hma lakna tawiawm turin ngen an ni.

Vawiin Programme hi Pu B. Lalchhuanliana, Addl. Director, School Education-in kaihruaiin Pu Lalzarzova, Superintendent & MIS Coordinator, State Project Office, SSA hnen atangin Technical Report ngaihthlak a ni a, U-DISE Day School Education Department Officer te, SSA leh RMSA lama officer zawng zawngte an tel a ni.