810/2022-2023
Aizawl the 7th June, 2022 : Vawiin khan School Education Minister Pu Lalchhandama Ralte chuan Mizo Students' Union (MSU) General Headquarters-in Chanmari YMA Hall-ah Mizoram Board of School Education (MBSE) hnuaia Higher Secondary School Leaving Certificate (HSSLC) Examination, 2022-a Mizo Top-3 te lawmpuina hun an buatsaih a hmanpui.
Top 3 lawmpuina hun Pu Lalramhluna Fanai, Treasurer, MSU Gen. Headquarters, Aizawl kaihhruaiah Pu Lalchhandam Ralte, Minister, School Education chuan kumin HSSLC-a zirlai tithate a lawmpui thu a sawi a, zirlai kalkhawmte zingah nakumah engzatnge dawng ve tur awm ang tih chona a siam bawk. School Education Minister chuan MSU hruaitute nen Mizorama zirma siamthatna kawngah ram leh hnam tan inpawh tlang takin sorkar nen thawhhona an nei zel thei chu a lawmawm a tih thu a sawi. Sorkar hmalakna duh khawp loh lai a awm pawhin MSU ten an finchhuah fo thin avangin an chungah lawmthu a sawi bawk. Khuallian chuan vawiina hlawhtlinna changte hian ram leh hnam tan theihtawp chhuah turin a fuih a; hetiang chawimawina an dawn hian Mizo miputen an chhinchhiah bik a, an enthla bik zel avangin nun uluk turin a fuih a ni.
School Education Minister Pu Lalchhandama Ralte chuan thu sawi zelin, Covid-19-in zirna nasa takin a nghawng a, kum hnih chhung regular class kalpui theih a ni lova, zirlaiten kum an hloh lohna turin sorkarin a tul ang zelin kawng hrang hrangin ruahmanna a siam sak thin a ni a ti. Covid vuak hi a nat em avangin Education Sector-ah hian nasa takin hun lokal turah pawh nghawng a la rawn nei dawn a, zirlai leh an nu leh pate pawhin hemi kawngah hian ngaihtuahna siamthar a, zirnaah an tui theihna turin in lamah an lo tuipui theihna turin boruak nuam siam turin a ngen bawk a ni. Hmun dangte pawhin Covid hi an tuar ve tho va, harsatna phenah a ti tak tak te, a tang tak tak te tan chuan hun harsa an tawh kha invuak thluk tir lova tan la zual sauh sauh tura thinlung pu a, tumruhna nei zual turin zirlaite a chah bawk a ni.
Khuallian chuan kan education quality leh syllabus te enin MBSE standard hi India ramah hian a hniam reng reng lova, CBSE Syllabus nen inang thlap a, topic thlan thenkhat erawh a dang a ni a ti a. Mizorama kan exam dan pawh India ram standard ang thovin kalpui a ni a, naupangin an thiamna tak tak an pawchhuak thei turin education system pawh thlak danglam hret hret a, sorkar pawh chumi ang chuan a kal a ni a ti. Zirtirtutr pawh a tam theih ang berin training pek zel an ni a; All India level-a scheme hrang hrangte pawh hman uar zual zel a ni bawk dawn a ti.
Vawiin Top 3 lawmpuina hun hmanah hian Pu Lalhruaitluanga, Managing Director, ZoCareer Solution chu Resource Person a ni a. Pu Samuel Zoramthanpuia, General Secretary, MSU chuan report & introduction a pe bawk a ni.
Attachment
- Loading attachment...
