3638/2023-2024

Aizawl, the 2nd February 2024: Vawiin chawhma khan School Education Department chuan Conference Hall, Directorate of School Education, Aizawlah State Level Veer Gatha Winner zirlai mi pariat hnenah lawmman hlanna hun an hmang a. He hunah hian Dr. Lalzirmawia Chhangte, Secretary, School Education Department chu khuallian a ni.

School Education Secretary chuan sorkar leh department hmalakna hrang hrang leh Veer Gatha Project han ngaihtuah ringawt pawh hian National Language thiam pawimawhna a lang hlea a hriat thu a sawi a; chu bakah, hmalakna hrang hrang report leh portal & website-a upload that leh documentation atan tan lak zual deuh deuh tha a tih thu a sawi a. Veer Gatha Project chungchangah sipai leh civil mite huaisen lawmman dawng an thahnem tawh hlein an nunah entawn tlak a tam a, mipui leh vantlangin kan chhawr thin a ni a ti a. Mi huaisente chuan an nunna thap leh an nunna hial hlanin hma an hruai thin a, midangte pawhin thil tha ti turin thil harsa leh khirhkhan pawh kan hmachhawn ngam phah a; mi huaisente chuan tih theih loh tur zawngin thil an ngaihtuah lo va, hlawhtlinna pawh an chang nge nge thin a ni tih a sawi. Zirlaite pawh an tum tisang tura fuihin, India ram politician lar ni thei tur hialten huaisen takin ngaihtuahna hmang se a ti a; zirlaite chu an zirnaah leh sport an neihnaah bakah an thil tihna kawng hrang hrangah a sang ber ni thei tura theih tawp chhuah thin turin a chah a. Mizo mipui leh hnam pum pui pawh fing taka ngaihtuahna hmang chungin hnam huaisen kan nih a ngaih thu te, kan huaisen theih nan ei leh bara intodelh theih te a pawimawh hle tih a sawi.

He lawmman hlanna inkhawm hi Pu Lalsangliana, Director, School Education Department chuan a kaihruai a. Pu Lalsangliana chuan Veer Gatha chu ram chhunga mi huaisen chawimawina dawng tawhte ngaih hlut an nih theih nan leh zirlai sikul naupangte pawhin huaisen taka ram leh hnam hmangaihna thinlung an put theih nan intihsiakna hrang hrang – story writing, paragraph writing, poem, painting, multi-media presentation hmanga sikulah inelna a nih thu a sawi.

He intihsiakna hi District level Evaluation Committee-in DEO (District Nodal Officer) ten kaihhruaiin lo endikin, chu mite thlan chhuah chu State level Evaluation Committee-in Director of School Education kaihhruaiin uluk taka endikin State Level Veer Gatha lawmman dawngtu mi pariat an thlan chhuah thu a sawi a. Mizoramin nomination a neih theih zat National Level-ah mi 40 rawta thawn thlak a ni a; mahse, Mizoram chu kan vawikhat telna a nih avangin vanduaithlak takin National Level Veer Gatha lawmman dawng kan awm rih lo a ni a ti bawk.

State Level Veer Gatha Winner lawmman hlanna inkhawmah hian Pi Zohmingliani, Director, SCERT chuan thu sawiin, Veer Gatha hi Mizoram kan tel vawi khatna avangin National level-ah lawmman dawng pha rih lo mah ila; tuna tang hian mi huaisente chanchin leh mi huaisen lawmman dawng tawhte chanchin hriatna lamah sikulahte hma lak chhoh a pawimawh thu a sawi a.

Pu Lalhmachhuana, Additional Director, School Education Department chuan lawm thu sawiin, tunlaiah zirna sikulah co-curricular activity a tam tawh avangin zirtirtuten lehkha zirna hun a awm mang lo ti mai loin, curriculum & syllabus leh textbook-a lang lo pawh zirna a ni vek a ni tih hriat a pawimawh thu a sawi bawk.

He Veer Gatha State Level lawmman semnaa khual lian Dr. Lalzirmawia Chhangte, IAS, Secretary, School Education Department leh Veer Gatha State Project Director ni bawk chuan lawmman dawngtute hnenah certificate leh pawisa fai Rs. 8,000.00 theuh a hlan.

Technical report petu Pi Ng.Fanchun, Deputy Director leh State Nodal Officer chuan Veer Gatha chu sawrkar laipui Ministry of Defence leh Ministry of Education thawh honaa kalpui a nih thu te, tun financial year 2023-24 hi Veer Gatha 3.0 (version 3) a niin a ?um 3-na a nih dan te, Mizoram chu kan tel vawi khatna a ni thu te a sawi a. Project Veer Gatha version 3.0 hi class 3- 12 tana buatsaih a ni a, category 4-ah thenin class 3-5 chu category 1, class 6-8 chu category 2, class 9-10 chu category 3 leh class 11-12 category 4 tiin then a ni a ti a. Mizoram State ah hian Districts 6, Aizawl, Lunglei, Champhai, Saitual, Mamit leh Kolasib Districts atangin participants kan nei thei a. School 100 atangin mi 207 entries an awm a, Aizawl District 126, Champhai 45, Lunglei 22, Kolasib 6, Mamit 4 leh Saitual 4 atangin participant an awm bawk a ni.

State level State Level Veer Gatha Winner zirlai 8 awmin hengte hi an ni:-

Category 1:
1) Angela d/o Rajendra Sharma, Gov’t. P/S, Kulikawn = Painting
2) Shretash Sandip Ghuge s/o Sandip Ghuge, Kendriya Vidyalaya, Lunglei = Painting

Category 2:
1) Esther Lalnunfeli d/o Lalramfela, Gov’t. Pukpui Middle School-I = Paragraph writing
2) Christina Vanlalfeli d/o RS. Pahlira, Gov’t. Buchhawna Mem. M/S = Painting

Category 3:
1) Lalnunsangi Ralte d/o Lalthamawia Ralte, St. Paul’s HSS, Tlangnuam = Poem
2) Kavya Ahluwalia d/o Rachit Ahluwalia, Kendriya Vidyalaya, Aizawl = Paragraph writing

Category 4:
1) Lalhriathlui d/o Zodinsanga, St. Paul’s HSS, Tlangnuam = Paragraph writing
2) Ngurthansangi Tochhawng d/o Lalthantluanga Tochhawng, Gov’t. G.M. HSS, Champhai = Painting