Vawiin Dt. 18.11.2016 chawhnu dar 2:00 pm khan School Education Department leh Doordarshan Kendra, Aizawl chuan Conference Hall, Directorate of School Education, McDonald  Hill, Zarkawt, Aizawlah zirna tihhmasawn nan leh School Education Department hnathawh mipui hriat atana puanzar nan thawhdunna thuthlung ‘Memorandum of Agreement’an ziak.

School Education Department leh Doordarshan Kendra, Aizawl ten Thawhdunna thuthlung an ziakah hian School Education Department atangin Pu P. Lalchhuanga, Secretary, School Education-in hming a ziak a, Doordarshan Kendra, Aizawl atangin Pu Wonchan Ramsan, Head of Programme, Doordarshan Kendra, Aizawl-in hming a ziak bawk a ni.

School Education Department leh Doordarshan Kendra, Aizawl ten Thawhdunna thuthlung an ziahna programme hi  Pu H. Rohluna, Minister, School Education  leh Pu Joseph Lalhimpuia, Parliamentary Secretary, School Education te pawhin an telpui a, Minister Pu H. Rohluna leh Parliamentary Secretary Pu Joseph Lalhimpuia te chuan Kum khat kalta chhunga School Education Department leh Doordarshan Kendra, Aizawl te thawhdunna chu tha an tih thu leh thawhdunna thuthlung ziah thar leh chuan  hun lokal lehzel turah pawh zirna chauh ni lo, Mizoram tan kawng hrang hranga hmasawnna a thlen ngei an beisei thu an sawi a ni.

School Education Department leh Doordarshan Kendra, Aizawl hian thawhdunna thuthlung hi July ni 17, 2015 khan kum khat atan an lo ziak tawh a, tun tumah hian kum khat dang atan  thawhdunna thuthlung hi an ziak leh ta a ni. Thawhdunna thuthlung hnuaiah hian kartin Ningani tlai dar 6:00-6:30 pm chhungin Educational Television Programme chu Doordarshan Kendra , Aizawl-ah tihchhuah thin a ni.

Thawhdunna thuthlung ziahna Programme hi Pu P. Lalchhuanga, IAS, Secretary, School Education-in kaihruai a, Pu K. Lalthawmmawia, IAS, Director, School Education-in report pein, Pu R. Zarzosanga, Special Secretary, School Education-in Vote of Thanks a sawi a, DDK, Aizawl; SCERT, MBSE leh School Education Department-a Officer thahnem tak an tel a ni.