78/2023-2024

Vawiin khan Secretary School Education Dr Lalzirmawia Chhangte Office chamber, MINECO Aizawlah School Education Department leh Rotary India Literacy Mission-ten naupangte zirtirna TV programme-a pek chhuah kawnga thawhdunna tur MoU an ziak.

Ministry of Education, Government of India chu state tinten zirna (education) atan bik liau liau, a thlawna hman tur TV channel pe turin a in ruahman mek a, hei hi zirlai tin te, hmun kilkhawr bera awm te, zirtirtu awm mumal lohna hmuna zirlai awmte pawhin zirna tha an dawn theihna atana ruahman a ni. He ruahmanna hi PM eVIDYA DTH TV Channel tih niin School Education Department, Government of Mizoram pawh chu TV channel chu enkawl tura tih a ni. TV Programme te hi state tinin buatsaihin, BISAG, Gujarat atangin TV programme hi an rawn chhuah thin dawn a ni. He PM eVIDYA programme atan hian SCERT, Mizoram chu State Coordinating Agency atan ruat a ni.

He programme tihlawhtling tur hian Rotary India Literacy Mission (RILM) chuan NCERT Syllabus mil a Learning content an siam sa te a thlawna hman theih turin Mizoram chu thawhpuiah an rawn sawm a, hun engemaw chen inbiakna a kal hnuah vawiin 11th April, 2023 dar 2:30 PM khan Secretary, School Education Department office ah he thawhhona thuthlung, MoU hi sign a ni ta a ni. He programme hi Zoom hmangin RILM lam atangin Pu Kamal Sanghvi, Chairman, RILM, Pu Biswajit Ghosh, Chief Executive Officer, leh Pu Shekhar Mehta, President, Rotary International (21-22) ten an rawn hmanpui bawk. MoU hi School Education Department aiawhin Secretary Dr Lalzirmawia Chhangte in a ziak a ni.