79/2023-2024
Aizawl, 11th April, 2023: Zoram Medical College-a MBBS zirlai hmasa ber (2018 batch) te result chu vawiin khan tihchhuah a ni a. Exam beitu zirlai 95 zingah mi 68 ten hlawhtlinna changin, pass percentage hi za zela 71 a ni a, Lalrempuii Hmar chu pakhatna a ni.
Zoram Medical College result chhuak chungchangah hian Health Minister Dr. R. Lalthangliana chuan thuchah siamin Zoram Medical College-in chanchin lawmawm tak a nei chu Mizoram tan mellung pawimawh tak a nih thu a sawi a. Sawrkar hmasain theihtawp chhuaha bul a lo tan tawhna ah lawmthu sawiin, Medical College puitlin nan tun sawrkar pawhin theihtawp a chhuah a ni, a ti bawk.
Covid-19 hripui vanga hun harsa leh khirh tak Mizoramin a hmachhawn karah Zoram Medical College chu Dedicated Covid Hospital-ah puan niin, hemi avang hian MBBS zirlaite pawhin harsatna tam tak an tawk tih Minister chuan a sawi a. Harsatna tam tak kara hlawhtlinna chang zirlaite chu a lawmpui thu sawiin, tun tuma hlawhtling ta lo te tan Mizoram University-in exam a buatsaih leh thuai tur thu a tarlang nghal bawk. MBBS zirchhuak thar ten Internship an tan thuai theih nan sawkarin hma a lak mek thu sawiin, National Medical Council-te nen indawrna kalpui mek a ni, a ti a. Hei hian nakkum lamah chuan doctor indaihlohna pawh engemaw chenah a phuhruk ngei a beisei thu Health Minister hian a tarlang nghal a ni.
ZMC result kimchang en duh tan a hnuaia link ah hian en theih a ni.
zmc.edu.in/post/result-of-3rd-mbbs-part-ii-uni-exam-2018-batch
