3808/2024-2025

15th January, 2025 : Vawiin khan School Education Complex Conference hall-ah Mizoram Samagra Shiksha-in Interactive flat panel GEM kaltlanga an lei chu School Education Minister Dr Vanlalthlana hovin sem a ni.

Minister chuan he hunah hian thusawiin Interactive flat panel chu sorkar hmasa hun laia sem tawh chhunzawmna a ni a ti a. Zirnaah hian khawvel technology changkang zel milin kan kal ve thei tur a ni a, zirlaite hian hna an zawn hunah tunlai technology nen an inel tawh dawn a, chuvangin zirlaibu bakah zirtirtute pawh tunlai khawvel mila kan inher rem ve zel a ngai a ti a. Tunlai khawvelah hian eng nge thleng tih ngaihven a kan inchhiar var a, kan hriatna chu zirlaite kan pek chhawn ve leh a ngai a ni a ti.

Minister chuan classroom a zirtirna chu smart board hmangin audio visual mode-a kalpui theih a lo ni ta tih sawiin zirtirtute chu naupang an zirtirnaah a tam thei ang ber hmang tangkai turin a chah a. Zirtirtute chu naupangte zirtirna kawngah khalh luh tumna goals nei turte leh chumi mila kal thin tur chuan a fuih bawk. Zirnain hma a sawn theih nan zirtirtute chuan lesson plan an siam te pawh ngai dawn tih a sawi bawk.

Interactive flat panel hi school 13 hnenah sem a ni a, chung sikulte chu- Govt Chaltlang High School, Govt Hrangchhuana High School, Govt Pianghleia High School, Govt Sihphir High School, Govt KVM High School, Phunchawng RMSA Secondary School, Govt MICE High School, Govt J.L.High School, Govt Central High School, Govt Kulikawn High School, Govt Sialsuk Higher Secondary School, Govt Republic Higher Secondary School leh Govt Republic High School te an ni.

    Minister hi Education Consultant Rev Dr K.Thanzauva’n a tawiawm a, he interactive flat panel semnaah hian Samagra Shiksha officer-te leh interactive flat panel dawngtu Principal, Headmaster leh zirtirtute an kalkhawm a ni.