3809/2024-2025

Aizawl, 15.01.2025: PWD Commissioner & Secretary Pu K. Lalthawmmawia chuan vawiin chawhnu khan PWD Conference Hall, Tuikhuahtlang ah Online a Road Cutting dil theihna 'Road Cutting Online Portal for Rural and District Headquarters' https://pwdroadcutting.mizoram.gov.in/ a hawng. He portal hi thingtlang leh District Hqrs. ah te hman tur a siam a ni a. Aizawl khawpui huamchhungah erawh chuan kum 2021 atang khan hman a lo ni tawh a ni.

He hmalakna in a tum chu PWD Office hrang hrang a kal kual kher ngai lo in, Road cutting mamawhte chu Online hmang in dilna (application), phalna (permission) leh a man chawi (payment) te hi a tih theih vek tawh a ni.

Online Portal hawnna inkhawm hi Er. Lalsangliana Chhakchhuak, E-in-C, PWD chuan a kaihruai a. Khuallian chuan Aizawl khaw pawn a awm ten mahni in lum atanga an hman ve theih mai tur Apps siam a ni chu lawmawm a tih thu a sawi. He hunah hian Er. B. Vanlalhruaii, SE (P) chuan report tawi pe in, Pu Isaac Zothanpuia, Project Manager, MSeGS chuan portal kalhmang leh hman tangkai theih hrang hrangte a sawifiah a. Pu John Varte, Cluster Head, HDFC Bank Mizoram hnen atangin Payment kal dan chungchang te ngaihthlak a ni.

Hawnna inkhawm ah hian MSeGS hotute, HDFC Bank hotute leh Department Senior Officers & Staff thahnem tak an tel bawk a ni. Inkhawm hi Er. C. Lalthlamuani CE (P) in lawmthu sawina neiin a khar a ni.

LINK : https://pwdroadcutting.mizoram.gov.in/