2441/2024-2025

Aizawl, the 9th October, 2024: Vawiin khan Mizoram Teachers' Federation (MTF) hruaitute chuan School Education Department changtu Minister Dr. Vanlalthlana chu kawmin MTF-te'n sawrkara an thu thlen duh hrang hrangte Minister hnenah hian an thlen a, inpawh tlang takin an thu thlente hi an sawi ho a ni.

He inkawm hona hunah hian Mizoram School Education Service chungchangte, school inspecting post ruak hnawh khah chungchangte, Hindi teacher post ruak hnawh khah chungchangte, school provincialization chungchangte, teacher transfer chungchangte leh tul pawimawh dangte sawi ho a ni a. MTF thu thlente hi Minister hian tha taka lo dawngsawngin, a theih anga a lo bawhzui tur thu leh a tul phawt chuan inkawm hona neih leh zel a duh thu a hrilh a ni.

MTF hruaitutte hian rilru inhawng taka Minister-in a lo dawnsawn avang leh hun tha tak a lo pek avangin lawm thu an sawi a. Mizoram zirna atana Minister hmalaknate theihtawp chhuahpui zel an tum thu an sawi bawk a ni.

Mizoram Teachers' Federation hi School Education Department hnuaia association hrang hrang khai khawmtu ber a ni a. He hunah hian elementary atanga secondary school zirlaite leh zirtirtute harsatna hrang hrang leh a sut kian theih dan turte pawh ngaihtuah ho a ni.