2440/2024-2025

Saitual, the 9th October 2024: Vawiin chawhma dar 11 am khan DC Conference Room, Saitualah PM Vishwakarma scheme chungchang ngaihtuahin Saitual District Implementation Committee (DIC) te chu an thu khawm.

District Bawrhsap Dr Lalngura Tlau chuan thutkhawm hi kaihruaiin kalkhawmte hnenah lawmthu a sawi a, Saitual district ah kum kal ta atanga district khua awm zawng zawnga CSC (Common Service Centre) 100% nei tura hma an lakna zarah central scheme-te pawhin hmun kil khawr ber ber a thleng ta chu lawmawm a tih thu a sawi a. India rama kut themthiamte leh thilsiam thiamte tanpuina leh khaichhuahna atana ruahman a nih angin mipui ten he PM Vishwakarma hi chhawrin hlawhtlinpui se a duh thu a sawi bawk a ni.

PM Vishwakarma Scheme hnuaiah hian trade 18 awmin Saitual district ah chuan trade 11 atangin kut themthiamna nei mi 413 ten dilna an thehlut a, chung zingah chuan Puanthui–33, Basket/Mat/Broom Maker/Coir Weaver–90, Lumettu – 10, Thing Mistiri – 11, Toys siamtu–1, Garment Maker–4, Tuboh & hmanraw siamtu–1, Lungchher–10, Thir lampang chhertu –5, Bel siam–1,Milem siam-1 te an awm a, an vain mi 167 ten Stage I (VC Level) an  paltlang a ni. Vawiina DIC member thukhawmte chuan dilna 167 kalmekte hi State level-a kalzel turin an pawm a ni.  Committee chuan he scheme kalpuina kawngah awareness a tam thei ang ber nei a, fimkhur lehzuala hma la turin an rel a ni.   

PM Vishwa karma scheme hnuaia loan la tur te’n Stage I-VC, Stage II-DIC, Stage III-SLBC paltlang tur niin, hemi paltlangte chu training tura koh an ni ang a, skill assessment an nei ang. Hemi hnu hian basic training ni 7/40hrs neih leh tur niin, chumi zawhah an trade thlan atan bungrua an mamawh zual lo leina tur Rs 15,000/-, e-RUPI/ e-voucher hmangin an dawng dawn a ni. Hemi hnu hian Vishwakarma Certificate leh ID pek tur niin, heng neite chauh hian Bank ah Loan hi an dil thei dawn a ni. Vishwakarma Scheme hnuaiah hian Rs 3 lakh thleng loan lak theih tur niin 1st tranche ah 1 lakh, 2nd tranche ah 2 lakh a lak theih dawn a ni. Loan punna hi 5% ah fixed a ni a, chumi aia sang bank-in interest rate a tuk anih chuan 8% thleng Sawrkarin a tum sak ang. Loan hi Scheduled Commercial Banks, Regional Rural Banks, Small Finance Banks, Cooperative Banks, Non-Banking Finance Companies leh Micro Finance Institutions te hnuaiah pekchhuah a ni ang.

PM Vishwakarma Scheme inkaihhruaina (guidelines) hi www.pmvishwakarma.gov.in website ah chipchiar zawk a en theih a ni a, Directorate of Commerce & Industries, Khatla leh District Industries Centre zawng zawngah zawh fiah theih reng a ni bawk.