24/2025-2026
Aizawl, the 2nd April, 2025: New Delhi-a meeting pawimawh chhim tura kal School Education Minister Dr. Vanlalthlana chuan vawiin khan Central Institute of Educational Technology (CIET) tlawhin, National Council of Educational Research and Training (NCERT) hotute nen inkawmhona hun hlawk tak an hmang.
Information & Communication Technology Minister ni bawk Dr. Vanlalthlana chuan sawrkar thar a pian hnua an hna hmasa ber pakhat chu aikal chhawr tihtawp leh pisa kai hun chhung en thlithlai a nih thu sawiin, hemi atana hmanraw tha ber chu technology a ni, a ti a. Mizoram sawrkarin Kai app a hman dante sawiin, VSK nen zirtirtute hman bik tura thlun zawm (integrate) tum mek a nih thu a sawi a. Mizoram hmasawn ngaihna tur ni a an hriatte chu a hnena thlen hreh lo turin a chah a; School Education Department hnuaia thawktute nen theihtawp chhuaha bawhzui zel an inhuam thu a hrilh a ni.
He hunah hian NCERT-in zirna hmanrua pangngai piah lama zirtirna (alternative learning system) an kalpui dante, DIKSHA portal kaltlanga digital education content siama dah chhuah a nih dante bakah zirlai leh zirtirtute tana educational technology hman tangkai a nih dante a hmun ngeiah en hova sawi ho a ni.
Hei bakah hian ram pum huapa Vidya Samiksha Kendra (VSK) kalpui a nih dan leh Mizorama hman a nih dante sawi ho a ni bawk a. VSK hi technology leh data analytics hmanga school zirtirtute leh school dinhmun en thlithlaina niin, data hmanga thutlukna siamna tur leh zirna chungchanga sawrkar tha tihchakna tur leh langtlang sawrkar siamna tura hmanraw pawimawh tak a ni.
Minister Dr. Vanlalthlana hian sawrkar laipuia hotu thenkhat hmu tur leh meeting pawimawha tel turin April ni 1, 2025 khan New Delhi a pan a, Private Secretary Dr. Albert Vanlalruata'n a tawiawm a ni.
