4696/2024-2025

Dated the 18th March, 2025 : Vawiin khan School Education Department buatsaihin Aizawl lammualah ruihhlo hman sual, mipat hmeichhiatna leh HIV/AIDS chungchang inhrilhhriatna neih a ni a, School Education Minister Dr Vanlalthlana chuan khuallian niin he hun hi a hmanpui

He hunah hian Minister Dr Vanlalthlana chuan thusawiin Mizoram hi India ram pumah mihring tam lam atanga chhutin HIV/AIDS-ah pakhatna ni mah ila, he dinhmun hi kan tidanglam thei a ti a. Zirlai kalkhawmte chu vawiina Mizoram dinhmun tidanglamtu ni tur leh, ruihhlo leh mipat hmeichhiat hman sualna laka inthiar fihlim turin a chah. Minister chuan infiamna hian a ken tel chu mahni inthunna a ni a ti a. Infiamna engemaw berah emaw inhmanga competition hmachhawn thin turin a chah a, chu chuan chhelna leh beih leh zel duhna a neihtir thin a ni a ti. Zirlaite chu huaisen taka nung turin a chah a, hlau chung chung pawha ruihhlo ti lo ngam tur te, ngaihzawngten an thlem pawha mipat hmeichhiatna hmang lo ngam turtein a chah a, mi huaisen chu hriat hlawh an ni dawn a, pian ve mana mi zahawm nih hi a hlu a, zahawm tak leh huaisen taka nunga ruihhlo leh mipat hmeichhiatna laka inthiarfihlim turin a chah a ni.

MSACS Project Director Dr Jane Rinsangi Ralte chuan HIV hi Covid-19 te ang bawkin hripui a ni a, khawvel pum min tibuai a, natna dang angin thawk chak vut vut lo mahse, kan hlauh a ngai a ni a ti a. Ram pum huap chawhrual aiin Mizoram hi a let 10-in a sang a, thla tin case 200-a pung zel ang kan ni a, hei hi mahni in test atang chauhin a ni a ti. Mipat hmeichhiatna avanga kai hi HIV kai zawng zawng atangin zaa 67 an ni a, za zela 30 chu hriau thianghlim lo an ni a, zaa 57 te chuan an that lai hunah an kai tih a sawi bawk. HIV kaite hian dam chhungin damdawi an ei a ngai a, chu chuan taksa peng hrang hrangah nghawng a nei thin a, chuvangin, kai lo tura inven reng a pawimawh a ni a ti bawk. Dr Jane-i chuan mipui nawlpuiah HIV hi a darh mek a ni a ti a. zirlaite chu nunphung hrisel nei turte, zuk leh hmuam, ruihhlo, zu leh mipat hmeichhiatna laka inthiarfihlim turin a chah bawk. 

He awareness campaign hi Pi Angela Zothanpuii Director, School Education Department-in a kaihruai a, AR lammual ni thin chu mipuite kuta hlan a nih hnua punkhawm hmasak ber neih a ni chu hriatreng a ni dawn a ti a. Kalkhawmte chu hlawk taka he hun hi hmang turin a sawm a ni.  Kalkhawmte chuan Tv Denic Lalruattluanga  Gold Medalist, Asian Arm Wrestling Cup 2024 kaihhruaiin taksa uluk leh thianghlim taka vawng tur te, ruihhlo hi ram leh hnam hmelma lian ber a nih avanga ti lo turin an intiam a ni. 41st Mizoram Secondary School Games 2024 Champion District Aizawl leh 21st Higher Secondary Games 2024 Runner Govt Mizo HSS ten Exhibition Football Match an khel a. He hunah hian School Education Department Officer te, SCERT, Samagra Shiksha Officer te, zirtirtu leh zirlaite an kalkhawm a ni.