791/2023-2024

Aizawl, the 14th June 2023 : Nimin ni 13.6.2023 khan School Education Minister Pu Lalchhandama Ralte hovin Lawngtlaia LADC Chief Executive Members Conference Hall-ah Lai Autonomous District Council hotute nen meeting neih a ni a, LADC huamchhunga zirna kalpui dan tur sawiho a ni.

Pu Lalchhandama Ralte chuan he hunah hian  Lawngtlai District huamchhunga zirna lama hmasawnna hnathawhte a sawi a, Higher Secondary School-ah Science zirna pek belh tur te, zirna sikul building țhenkhat sak țhat leh repair hna thawh a nih thu te a sawi a, a theih ang angin sorkarin zirna siamțhat hna a thawk zel a ni a ti. Minister chuan tun hnaia sikula thawk tur zirtirtu lakah a theih ang angin a khaw mite lak an ni a, hei hian thingtlang lamah an post a awm țha duh lo a tih ziaawm theih beisei a ni a ti bawk. LADC member-te chu zirna kawnga an țhahnemngaihna chu lawmawm a tih thu a sawi bawk.

LADC member-te nena meeting neihah hian Lawngtlai District chhunga  Middle School 18, Mizoram sorkarin a provincialise tawh te, LADC kuta hlan let leh dan turte sawiho a ni a, LADC kuta hlan let hi hman hmawh theih anih loh avangin fimkhur taka kalpui dan turte sawiho a ni a, thutlukna siam hmain heng school a thawk mekte hi State hnuaia awm nge an duh Council hnuaiah tih te thlan feltir an ni dawn a ni.

Meeting-ah hian Lai Autonomous District Council member-te leh Council-a official țhenkhatte an tel a, Minister hi Pu Lalhmachhuana State Project Director Samagra Shiksha leh School Education Department officer thenkhatten an tawiawm a ni.