Nimin khan School Education Minister Pu H. Rohluna hovin School Education Department Conference Hall-ah School Education Department chuan meeting pawimawh tak an nei. Meeting-ah hian Parliamentary Secretary Pu Joseph Lalhimpuia; Secretary, School Education Department; Director of School Education; Directorate of School Education-a Officer te; Director & Officers, SCERT te, Chairman & Secretary, MBSE leh Education Department Secretariat-a Officers te an tel a ni.
He meeting-ah hian School thenkhat zirlai naupang neihloh avanga school leh school inchhunfin na tura hmalak mek te thlir ho a ni a, zirlai naupang tlemna school inchhunfin hian zirtirtu indaihlo pawh a chhawk zangkhaiin chutiang school naupang awm mang lohna school ngun leh zuala lo en nawn leh turin Minister chuan Officer te a chah a ni.
Language subject chungchang sawi ho a ni a, Middle school-ah leh High School-ah te Hindi Teacher engemaw zat dah an ni a, Mizo te hi Hindi ah kan la chak tawk lova hriat a ni a, chuvangin High School level-ah chuan state pawn zinna ah te Hindi a tawng thei turin zirtir thiam an tul thu Minister chuan a sawi.
School timing sawn hma chungchang uluk taka sawiho a ni a, meeting chuan zirlaiten khaw eng tangkai leh daihzai zawka an hman theih nan school timing tihdanglam chu a thuphungin tha an ti a, hemi chungchang lo zir chiang lehzual turin Secretary, School Education Chairman-na hnuaiah Committee din ni se a ti a ni.
