Vawiin khan Vety. Complex Farm Veng, Lunglei-ah Lunglei District chhunga AH&Vety Department chuan RKVY hnuaiah Vawkpui vulh tura thlan chhungkua 63 te hnenah Vawk note 125 sem a ni.

Vawk note semna inkhawm hi Dr.Vanlalbuanga, DVO-in a kaihruai a, Dr.Rokhawla, Joint Director (Southern Zone) chuan thusawiin Mizote hi vawksa ei hnam kan ni a, amaherawh chu kan intodelh lo hle a, vawk vulh kan uar a kan tih pun a ngai a ni, a ti. Khawchhak vawk la lut lovin tualchhung vawk ngeia intodelh kan tum tur a ni a, Central Scheme RKVY kan nei hi a lawmawm hle a mipui ten hlawkna kan tel tan mek a ni, a ti. Ramdang atanga Vawk note lakluh ngai lo khawpa tan kan lak nasat leh zuala tul thu leh Lunglei District chu vawk vulh laah intodelha kan sia theih nan theihtawp chhuah turin vawiina beneficiary kalkhawmte a chah a ni.

Sawrkar remruatnain AH&Vety Department chuan vawk-a kan intodelh theih nan Vawkpui vulh tam a, Vawk note neih tam turin theihtawp a chhuah zel a. RKVY hnuaiah hian chhungkua 124 te hnenah Vawkpui tur pakhat(1) theuh sem a ni a, chhungkua 2 te hnenah Vawkpui panga (5) ve ve vulhna tur pek tawh a ni bawk tih Dr. Vanlalbuanga, DVO chuan a tarlang bawk.