Vawiin khan Agriculture Department chuan an Directorate Committee Room-ah khawkheng leh chhiatna thlen thulha loneitute chhawmdawlna - Crop Insurance chungcahngah zirhona (workshop) an nei a, Department Officer thahnem tak an tel.

He hun hmanpuitu Dr. C. Lalzarliana, Director of Agriculture (Crop Husbandry) chuan Mizoram-ah loneituten Crop Insurance duh anga an la hriat chian tak tak loh thu sawiin, hemi kawngah hian zau zawka loneitute zirtirna leh inhrilhhriatna a pawimawh thu leh, loneitu tam thei ang berin Crop Insurance hi hmang tangkai thei se a duhthu a sawi a. Insurance Scheme kalpui tur hian a ram, a hmunhma leh thlai te Sorkar-in a puan a ngaih thu Director chuan a sawi bawk.

He Workshop-ah hian Crop Insurance chungchanga hriattur pawimawh hrang hrang te sawiho a ni a, heng zingah hian National Crop Insurance Programme (NCIP) leh a kalphung te sawihovin, loneituten an chhawr tangkai theih dan leh khaw awmdanin a zir loh emaw, chhiatna hrang hrang lo thlen thulha loneituten zangnadawmna an hmuh theih dan leh an hmuh theih zat tur bithliah hrang hrang te zirho a ni.

National Crop Insurance Programme (NCIP) hnuaiah hian Modified National Agriculture Insurance Scheme leh Weather Based Crop Insurance Scheme (WBCIS)-te awmin Rabi 2013-2014-ah pawh hman mek a ni.  WBCIS hi thlai hrang hrang – Buh lam chi, Be kawmei, thlai hriak nei, sumdawnna thlai leh huan thlai hrang hrangah te, fur leh thal thlaiah te hman theih a ni.

Crop Insurance hi kum 2010-2011 chhung khan India rama District thlan bik 80-ah kalpui a ni a. Heng District thlan bik zingah hian Serchhip District pawh telh niin, khaw hrang hrangah Crop Insurance hi kalpui a lo ni tawh a ni. Crop Insurance hi pawisa siamna hmanrua a ni lova, Insurance vawi khat hian thla 6 chhung zel huamin Rabi leh Kharif Season chhung atana tih thin a ni.

Vawiin hunah hian K.C. Bahera, Regional Manager, Agriculture Insurance Company of India Ltd., Guwahati atanga lo kal chuan zirtirna pein, sawihona hun tha tak neih nghal a ni.