Vawiin khan Mizoram Youth Commission Chairman Pu T. Sangkunga hovin MYC leh LE&IT Department tangkawpin IQST (Institute for Quality Skill Training), Guwahati-a tun thlatawp a training-a tirhchhuah tur thalai hmeichhe 40 rual vel kawmna leh thupawimawh hrilhhriatna hun DRDA Conference Hall-ah hman a ni.

Pu T. Sangkunga chuan trainee turte chu tuarchhel leh rinawm taka zir turin a chah a. MYC leh LE&IT Department tangkawpin training petu Vocational Training Providers (VTP) hrang hrang zinga tha leh rintlak tura an thlan bikte ah Mizo thalaite a thlawna zir a, company hrang hrang hnuaia hna tha tak hmuh ngei tura an hmalaknaah MYC Chairman chuan zirlaite an pawimawh hle a ni, a ti a. Heng VTP-te nen hian thawhhona thuthlung tha tak an ziahpui thu leh, an zirna hmun tur pawh uluk taka an zuk enfiah tawh thu a sawi a. Chuvang chuan trainee-te hlawhtlinna chu anmahni mimalah a innghat a, beidawng mai lova tih tak takna nena zir a ngai a ni, tiin MYC Chairman chuan kalkhawmte chu a fuih a ni.

He hun hi Pu Lalsawmzuala, Superintendent, MYC in kaihruaiin, a lai laklawha beidawng mailo turin leh, nun uluk taka awm turin training turte chu a chah a. Taimak chuan rah tha a chhuah zel thu sawiin, training tura kumina tirhte zingah hna hmu an awm tan tawh thu a sawi bawk.

Tun tuma MYC leh LE&IT Department tangkawpin training tura thalai an tirhchhuah turte hian IQST (Institute for Quality Skill Training), Guwahati-ah course hrang hrang – Aviation, Hospitality, Retail leh course dangte an zir dawn a. An course an zawh hian Sorkar laipui hraitpui Certificate dawngin, hna hmuhsak ngei ngei IQST hian a tiam bawk a. Training zo tawh ten hna an hmuh loh chuan VTP-te hian Sorkar atangin an sum sen rulhna tur (reimbursement) an hmu thei dawnlo a ni.