2361/2026-2027

Dated Aizawl the 24th of September, 2026: Vawiin khan School Education Complex Conference Hall, Mc Donald hill-ah India ram puma zirna tha leh tha lo tehna Performance Grading Index (PGI) chungchangah Mizoram Education Inspecting Officers’ Association member-te tan workshop neih a ni a, School Education Minister Dr Vanlalthlana’n khuallian niin he hun hi a hmanpui.

Minister Dr Vanlalthlana chuan he workshop-ah hian thusawiin India ramah ziak leh chhiarah a sang ber ni mah ila, zirna tha leh tha lo tehna Performance Grading Index-ah kan la san loh avangin tan lakna tur kan ngah hle a ni, a ti a. Tunah hian kum hmasa lam aiin hma kan sawn a, hmasawn tha pawlah kan tel a ni, a ti. Zirna tha siam turin tehfung zawng zawngah vawi lehkhatah hma kan sawn vek thei lo mai thei, zawi zawiin hma kan sawn zel ang a, kan dinhmun hi kan siamthat chhoh zel a ngai a ni, Minister chuan a ti a. Zirna a tlakchhiatna hmun apiangah sualna a pung a, Jail tang an tam thin, tiin Minister chuan “Zirna tha awmna hmunah mi thiam an tam a, mi rintlak, innghahna tlak an tam thin, kan hahdamna turin zirna tha kan siam a ngai a ni,” a ti bawk.

Minister chuan zirna tha nei turin zirtirtu tha kan neih a ngai a, zirtirtu tha nei turin training an neih that a ngai a, zirtirtuten darkar 50 training an neihna turin tan lak mek a ni, a ti a. School lian leh naupang neih tamna school-ah zirlaite tan zirna boruak a tha a, school 3974 kan neihah hian school 6 ah chauh class 1-12 an kalpui a, school lian kan ngah te pawh a pawimawh a, school naupang nei tlemte chu an bul hnaia awmte nen kaihkawp te pawh tum a ni, a ti. Minister hian PGI tehfung chi hrang hrangah te tan lak a pawimawh dan leh tan lakna tur te he workshop-ah hian a sawi a ni.

School Education Department Additional Secretary Pi Zothantluangi pawhin he workshop-ah hian thusawiin, PGI-in a tum bulpui ber chu NEP 2020 nen kalkawpin mi zawng zawng zirna quality tha pek a tum a ni, a ti a. Tun dinhmunah chuan kan zirna hi a quality a la sang tawk lova, tan lak a ngai hle tih sawiin PGI hi state dangte nena inelna ni mai lovin keimahni kan in enna tur a ni, a ti. School tlawh tam a pawimawhzia te leh Govt School te hi tute tan pawh luhna tlaka kan siam a tul a ni, a ti bawk.

He Workshop hi Samagra Shiksha State Project Director Pu C.Lalthanzira’n a kaihruai a, Deputy State Project Director Pu Zionparlawma chuan PGI a tehfung chi hrang hrangte a sawifiah a. Additional State Project Director Pu Vanlalrosiama Ralte chuan lawmthu a sawi a. Mizoram Education Inspecting Officers’ Association member-te an kalkhawm a ni.