Vawiin chawhnu khan School Education Minister Pu H. Rohluna chuan SCERT buatsaih Poetry Writing Festival 2016 leh Proficiency Award in English semna hun SCERT Auditorium ah a hmanpui a. Poetry writing festival 2016 ah hian Higher Secondary School 25 atanga zirlai ten hla an inphuah siak a; Proficiency Award in English hi HSLC leh HSSLC examination hnuhnungbera English subject bika Mark hmu sang zual te hnenah sem a ni thung.

School Education Minister Pu H.Rohluna chuan Mizoram tana zirlaibu siam chungchanga thuneihna neitu, SCERT in Mizo zirlai ten saptawng awlsam zawka an tawng leh ziah theih na tura ruahmanna tha tak tak an kalpui te chu sikul naupang ten an hlawkpui hle niin a sawi a. Saptawng chu hnamdang tawng ni mahse sumdawnna, hnathawhna leh tawngdang hmang te nen inbiak pawhna ber atana hman a nih avangin thiam pawimawh a ti a. Saptawng thiam tur chuan a tawng thiam bakah a ziah thiam tel a pawimawh a; saptawng hmanga hlaphuah theih phei chu thil awlailo leh saptawng thiam inenchhina atan thil tangkai tak a ni a ti. NCERT leh SCERT ten thawhhona tha tak neih chu chhunzawm zel se a duh thu sawiin zirlaibua zitirna zawng zawng ziah nana tawng hman lar, saptawng thiam hmasak chu zirna tha zirlaite hnena pek chhawnna atan hmanraw pawimawh hmasa a ni a ti a. Zirlai hlawhtling te chu an thiamna peipung tur leh Mizoram tana mi tangkai tak lo ni chho turin a chah.

Poetry Writing festival 2016 leh Distribution of Proficiency Award in English programme hi SCERT Director Pi Laldawngliani Chawngthu in a kaihruai a. He hunah hian Dr. Ramanujam Meganathan, Asso. Professor, NCERT pawhin thusawina hun a hmang a. He programme ah hian nidanga la tih ngai loh, thusawi kar laka hlachham rimawi bakah milem nena inchawih taka rem ngaihthlak a ni. Pi lalduhawmi Thomte, Tutor in hla inphuahsiakna kalpui dan te tarlangin Pi Zoramthangi Ralte, Tutor in Proficiency Award in English thlanchhuah dan a sawifiah thung a. Proficiency Award in English, 2016 ah hian Zirlai 43 hnenah lawmman sem a ni a; HSSLC ah Lalrindiki, OIKOS HSS leh HSLC ah R.Lalhriatpuii, St.Paul's HSS ten pakhatna an hauh a. Hla inphuah siak ah hian Angela Dengtluangpuii, Govt. Mizo HSS phuah ' New Love' chu mawi bera thlan a ni. Proficiency Award in English ah hian lawmman pakhatna hian certificate leh Rs.5000/- a keng tela, pahnihna in Rs.3500 leh thuziak, pathumna in Rs.2000 leh thuziak a keng tel. Hla inphuahsiak ah hian Lawmman pakhatna in Rs.2500 leh thuziak, pahnihna in Rs.2000 leh thuziak, pathumna in Rs.1500 leh thuziak a keng tel bawk a ni.