Vawiin chawhnu dar 3 khan Serchhip DC Meeting Room-ah Ministry of Sports and Youth Affairs, Government of India Flagship Programme, Khelo India Serchhip District Level Competition kharna hman a ni a, District Bawrhsap Dr. Lalrozama, IAS chuan khuallian niin a hmanpui a, he infiamnaa ti thate hnenah lawmman a sem nghal.

Khelo India District Competition kharna inkhawm hi Pu K. Lalrohlua, Addl. DC, Khelo India District Executive Committee Chairman ni bawkin a kaihruai a, Pu David Laldintluanga, Secretary, District Sports Committee leh Khelo India District Executive Committee Secretay ni bawk chuan report a pe thung.

Khelo India Serchhip District Competition-ah hian Infiamna chi hrang hrang 10 hmangin infiammi 227 te an intihsiak a, heta lawmman 1-na dawngtute hian State Level intihsiakna, ni 15 December, 2016 a neih turah District aiawhin an tel dawn a ni.