Bilkhawthlir (Pumping) Water Supply Scheme (WSS), Chemphai a mi chu vawiin khan Mizoram Governor Lt Gen Nirbhay Sharma, PVSM, UYSM, AVSM, VSM, (Retd) in a hawng.

Mizoram Larsap chuan Bilkhawthlir (Pumping) Water Supply Scheme hawn theih a a awm ta chu lawmawm a tih thu sawiin, hmalatu PHE department te leh a chhawr tangkaitu tur Bilkhawthlir khaw mipuite scheme tluang taka zawh anih vangin a lawmpui thu a sawi a. Tui thianghlim hi mihring te mamawh bulpui ber pakhat leh hriselna a tana tangkai tak a ni a, mitin tan tui thianghlim banphak a awm a tul a ni a ti a. Bilkhawthlir khua in tui harsatna an tawh thin chu he Water Supply Scheme hian a tih ziaawm ngei a beisei thu sawiin, hunrei tak chhung hman tangkai anih theih nan Department hnathawkte leh khawtlang mipuite tangruala dimdawi taka enkawl tura a beisei thu a sawi.

Larsap chuan Mizoramah ruahtui tamtak kan hmu chunga tui harsatna a awmfo mai chu pawi a tih thu sawiin, tui khawlna mumal siam leh tui renchem a ngaih thu a sawi a. Hemi kawngah hian Mizoram sorkar chuan hma la mekin NEDP ah hemi atan hian sum dah anih thu a sawi a. Thianghlimna kawnga hma kan sawn zel nan tuichhe paihna leh tuiluankawrh siamthat hna thawhchhoh mek zel ani a ti a. Open Defecation Free atana hmalakna pawh tui hnianghnar neih chuan a chak zawk a beisei thu a sawi a. Tui hnianghnar leh thianghlim in tur kan neih theih nana PHE Department hmalakna fakawm a tih thu a sawi bawk.

Bilkhawthlir (Pumping) Water Supply Scheme, Chemphai a mi hi Rs.780.47 lacs senga siam a ni a, Sorkar laipuiin 90% tumin Mizoram sorkarin 10% a tum a ni. Hna hi 30th September, 2011 khan tan niin, 29th January, 2016 khan zawh a ni a. Kum 2041 thleng a Bilkhawthlir khaw mitin tan nitin 70ltrs pe chhuak thei tura duan a ni a. Tui hi Chemlui leh Thingdawl lui atanga pump a ni a. Tun dinhmunah Bilkhawthlir (Pumping) WSS atang hian In 358 ah tui connection pek a ni a, Public Point 22 siam a ni. Water Treatment Plant leh Pump House siamna hmun a tan hian Bilkhawthlir khaw pa Pu Vawmphunga hriatreng nan phal takin a tu leh fate'n PHE hnenah an hlan a ni.

He hun hi Pu Zodintluanga, Minister PHED etc. chuan kaihruaiin kalkhawmte lawmna thu a sawi a. Minister chuan tui thianghlim mitin ban phaka a awm theih nan Mizoram Sorkar chuan hma ala zel a ni tiin, ni zung chakna hmangin Sekhum leh Kelkang ah water supply scheme siam a nih tawh thu a sawi a. Khaw hrang hrangah tui hnianghnar zawka hmuh a nih theih nan Water Supply Scheme buaipui anih thu a sawi bawk.

Bialtu MLA Pu K.Lalrinthanga, Parliamentary Secretary chu he hunah hian khualzahawm a ni.