Mizoram Basketball Association leh 39 Assam Rifles tangkawp buatsaih ‘Governor’s Cup Basketball Tournament’ chu vawiin khan Mizoram Governor Lt Gen Nirbhay Sharma, PVSM, UYSM, AVSM, VSM, (Retd)-in Hawla Indoor Stadium, Republic Vengthlang-ah a hawng.

Tournament hawnnaah thu sawiin Mizoram Governor chuan Mizo mipuite nena inlaichinna tha siam thei tura Assam Rifles hmalakna a fak a, Mizoram State Sports Council leh MBBA te nena thawhhona tha tak nei a, tournament an siam chu a lawmawm hle a ni, a ti. Mizoram state leh a chhunga cheng mipuite chu hmundangte entawntlak hiala siam theih a ni tiin Pu Nirbhay Sharma chuan Mizo nunphunga thil tha lo - zuk leh hmuam leh ruihtheithil/ruihlo lam erawh kan bansan a ngai a ni, a ti bawk. Khawtlanga upa zawkten thalai leh naupang zawkte tana entawntlaka an nun a pawimawh a, taksa hrisel chuan rilru hrisel a siam thin a. Mizo infiammi engemawzat, a bik takin footballer-te chu ramchhung mai ni lo, ram pawn an thleng mek a, hei hian Mizo thalaiten talent an neih thatzia a tilang a, nunphung hrisel zawk kan zawm phawt chuan Mizote chu hnam hrisel leh hmasawn ber pawl an ni thei a ni, a ti a. Tournament-a tel tur team zawng zawngte duhsakna a hlan bawk.

MBBA Sr Vice President Dr Lalrinawma chuan Mizoram Governor chungah lawmthu sawiin Governor’s Cup Basketball Tournament-ah hian Team 8 an tel tur thu a tarlang a. Team tel turte chu Assam Rifles, Rajput Regimet, Assam Regiment, Rajputana Rifles, Khatla TBL, Zarkawt Serpents, Tuikual South BC leh Mizssion Veng Vikings te an ni a. Lawmmnan Pakhatna chuan Trophy + Rs.50,000/-, Pahnihna -Trophy + Rs.30,000/- leh Pathumna - Trophy + Rs.20,000/- a keng tel ang. Governor’s Cup hi December ni 9-15,2016 thleng a awh dawn a ni.