Thalfavang Kut Organising Committee chu vawiin khan an Chairman Pu John Rotluangliana, Tourism Minister hovin a pisaah an thukhawm.

December ni 15 atanga 17, 2016 chhunga Tuirial Airfield-a Thalfavang Kut hlawhtling taka hman a nih theih nan inbuatsaihna ngawrh taka kalpui zel a ni a. Meeting-ah hian Kut a mawhphurhna hrang hrang neituten an inbuatsaih dan report an pe. Ruahman dan chuan Thalfavang Kut 2016 hi Tuirial Airfield ah December ni 15, Ningani ah Forests Minister Pu Lalrinmawia Ralte chuan a hawng ang a. Hawnna programme hi chhun dar 12 ah tanin zaithiam zai ngaihthlak tur te, hnam lam leh concert pui tham tak en turte a awm nghal dawn a ni.

Kut hman chhung zawng hian intihhlimna chi hrang hrang buatsaih tum a ni a. Thal inkahsiak te, rifle inkahsiakte, carnival, photo booth, hot air balloon, powered hang glider te bakah Mizoram Motor Sports Association (MIMSA) bultumin State pawn atanga chah chhuah stuntman te’n motorbike stunt an entir ang a, racing events engemawzat an buatsaih dawn bawk a ni. Handloom and handicraft stall leh food court hawn a ni dawn a. Mizo band lar tak tak te bakah hmarchhak state dang atanga band lar chah chhuah niin Royal Stag Mega Music Festival buatsaih a ni bawk ang.