Asia Pacific Youth Exchange Hanyang University, S.Korea-a hman mek chu Pu Lalchhandama  Ralte, School Education Minister-in a hmanpui. 

Minister chuan he Youth Exchange-ah hian  Ni 19 August 2019 khan Opening Ceremony-ah  keynote address a sawi a. Hanyang University, ERICA Campus-a hman Youth Exchange-ah hian Pu Lalchhandama Ralte chuan khuallian tura sawm a ni chu a lawmthu a sawi a. Minister chuan Mizoram chu British-in India ram an awp hma daih tawha khaw tinin lal neia inrelbawl thin a nih dan sawiin Sap hoin Mizoram an chhuahsan hnuah India lakah zalenna a sual a, kum 20 zet indo a nih hnuah MNF leh India ram chuan June 30, 1986 ah inremna puitling ziakin State puitlinga hlankai a ni ta a ni a ti a. Zirna chungchang pawh Minister hian sawiin Mizoram chuan zirna in nei mah ila hmanraw tha kan nei tawk lova, kan zirlaiten thiamna leh finna sang tak nei mahse an thiamna chher hriama khawvel hmun danga zir turin  remchanna (opportunities) leh resources an nei tha tawk lo tih sawiin heti lamah hian Mizoram state tan rualawhna ala nat thu te a sawi a ni. 

Minister chuan kan hmasawnna te chu muang viau mahse mi tumruh thalai kal hmasate zarah danglamna thlen tura kan thawkho thei tur hi a lawmawm hle a ni a ti a. He exchange programme-a APYE Program founder Mr. Hyoung Min Kim leh Nl. Alinery Lalngilneii Lianhlawng, Rochun dintu te zara Mizoram thalai mi 13 an tel thei chu lawmthu sawiin, an hmalak zelna turah duhsakna a hlan bawk a ni.

Mizoram aiawh a kal te lo mikhualtu Hanyang Uiversity, Keimyung University, Asian Development Bank, UNDP, Urban Youth Academy leh ram hrang hrang atanga thalai kalkhawm zawng zawngte nakum lamah Asia Pacific Youth Exchange (APYE) India-Mizoram a neih anih theihna tura hmalakpuiah a sawm a,  rawn chhim theuh turin Mizoram Youth Comission leh Vice Chancellor, Mizoram University te aiawhin a sawm nghal bawk a ni. 

Asia Pacific Youth Exchange (APYE) S. Korea 2019 ah hian ram hrang hrang atangin delegates 150 an kalkhawm a, he exchange hian ni 10 chhung a awh dawn a ni. Asia Pacific Youth Exchange hi Regional youth Program a ni a, Asia Pacific Countries atanga thlanchhuah ten United Nations Sustainable Development Goals (SDGs) hmangin khaw hrang hrangah zirchianna nei tura tirhchhuah an ni thin a ni. Tun tum APYE ah hian “Multiculturalism” chu thupui a ni a, thalai kalkhawmte hian hemi hmang hian S.Korea Khaw hrang hrang a issues and challenges-te chu an bitum anga, an zirchhuahte leh research based solutions te nen UN Representatives te hmaah an in lan ang. APYE winning team-te hian UNDP leh Hanyang University hnuaiah implementation kalpuiin funding an hmu  thei dawn a ni.

APYE S. Korea ah hian School Education Minister bakah Dr. Vanlaltanpuia, MLA, Chairman MYC, Pu Lalrinsanga Ralte MLA, Professor Laldinpuii Hmar Fente, MZU leh Pi Malsawmdawngliani Joint Director MYC te pawh sawm an nih angin leh APYE India, Mizoram 2020-neih a nih ve theih dan tur buaipuiin an tel bawk a ni.