3983/2022-2023

Nimin (24.3.2023) khan Chalfilh Group YMA inkhawmpui vawi 22-na chu Pehlawn khuaah hman a ni a, School Education Minister Pu Lalchhandama Ralte chuan khuallian niin a hmanpui.

Pu Lalchhandama Ralte chuan he hunah hian thusawiin Chalfilh Group YMA ten vawi duai lo an hnathawh țhat avanga YMA General Conference-a lawmman an dawng țhin chu chhuanawm a tih thu a sawi a. Hmar tlangdung chu tlangdung mawngping a ni țhin a, tunah erawh chuan nasa taka hma lak a nih avangin Zoram tlangdung hmasawn ber pawl a ni mek a, hmasawnna lo thleng mek chu chhawr țangkai thei tura inbuatsaih a ngai a ni a ti. 

Minister chuan țhangthar zingah Zonun ze mawi aia upa zahna  a tla hniam tial tial tih a sawi a, Zonun ze mawi a bo chuan he hnam hi a boral thei tih hre tur leh mahni awmna apianga hma la nghal turin YMA member-te a chah. Minister chuan social media-ah hmaichhana sawi duh loh tur thu mak sak tak tak a tam sawt hle tih sawiin social media țawngkamah fimkhur a pawimawh ta hle a ni a ti bawk.

Pu Lalchhandama Ralte chuan tun hnaiah Myanmar leh Bangladesh ațangin zohnahthlak harsatna tawkte tan YMA-in kawng hrang hranga hma a lak thu sawiin zofate inpumkhatna partir chu hnam dinchhuahna pawimawh tak a ni a ti a. Minister chuan YMA chu Kristianna nena inphiar zawm tlat a ni tih sawiin Kristian nuna thil pawimawh nun dan țha chu  inzirtir uar zel turin YMA member te a sawm bawk.  

Chalfilh Group YMA inkhawmpuiah hian khualzahawm Er. Lalhmingliani Hmar, E-in-C, P&E Department pawhin thu a sawi  bawk a. Chalfilh Group YMA inkhawmpui hi ni hnih chhung hman a ni a,  a ni khatnaah palaiten ro an rel a, a ni hnihna hi vantlang inkhawm leh lengkhawm zai intihsiak nan an hmang a,  hruaitu thar an thlang bawk.