Vawiin khan School Education Minister Pu H.Rohluna chuan ‘Connected Learning Initiative (CLIx) in Mizoram’ tih chu SCERT Auditorium-ah a hawng. Hawnna inkhawmah hian Minister hi Khuallian niin, School Education changtu Parliamentary Secretary Pu Joseph Lalhimpuia chu Khual-zahawm a ni.
Khuallian Pu H.Rohluna chuan, “Vawiina kan hun hman hi thil thar a ni a. CLIx bul tan nana India ram state tam tak atanga state pali (4) lek thlan chhuah zinga Mizoram kan tel ve hi a ropuiin, a lawmawm ka ti tak zet a ni,” tiin, a hlawkna teltu tur Mizo naupang 24,000 chuang leh anmahni zirtirtute’n tih tak taka tan an lak a ngaih thu a sawi a. Mizote hi a hlanga awm, Mizo tawng hlira inbe thei kan nih avangin tawng dangah harsatna kan tawk thin tih sawiin, CLIx kal tlang hian chu’ng harsatnate chu sut kian theih a nih a beisei thu a sawi bawk. Minister chuan sikul tam takin Computer set an dawnte hman lohva an dah mai mai leh zirtirtu thenkhatin mahni Personal Computer-a hmanga in lama an kawl daih thin chu tha a tih loh thu sawiin, sikul tana tangkai taka hman tur a ni a ti a. “Kan network a la that loh em avang hian CLIx kalpui nan pawh hian network thatna lai hmun kan thlan thiam a pawimawh dawn hle a ni,” tiin he programme hi kalpui tura inbuatsaih chhung a rei ang bawkin, a hlawhtlinna leh hlawkna pawh nasa leh zuala kan hmuh a beisei thu a sawi bawk.
Khual-zahawm Pu Joseph Lalhimpuia pawhin, “Tuna kan Education Minister-in min kaihhruai hnu hian zirna lamah hmasawnna tam tak kan hmu a ni,” tiin, chu chu Minister-in zirtirtute leh zirlaite, Education Department leh SCERT-a thawkte min rin tawk vang a ni a ti a. Kum hnih kal ta chhung khan MZP leh MSU te nen thawh hona tha tak neiin hmasawnna ropui tak tak kan nei a ni tiin, chu pawh chu Minister-in ziralaite welfare atana zirlai pawlte a rin tawk vang bawk a ni a ti bawk.
He hun kaihruaitu School Education Department Director Pu K.Lalthawmmawia chuan lawmna thu sawiin, Tata Institute of Social Sciences (TISS) leh Massachusetts Institute of Technology (MIT) atanga mi thiam lo kalte’n CLIx chungchanga hriat tur pawimawh hmasate an sawi a. MZU-a CLIx Project Incharge Dr Lalbiakdiki Hnamte chuan Mizorama CLIx kalpui a nih theihna tura hma lakna lo kalpui tawh dan report a pe bawk.
CLIx hi Mathematics, English leh Science subject-a zirna leh zirtirna tha, tlo leh rin tlak zawk a awm theihna tur te, high sikul zirlaite’n mahni inrintawkna nena bul tanna thuthmun an rem fuh thiam theihna tura ruahmanna leh hma lakna a ni a. Hemi atan hian TISS leh MIT te nen Mizoram sawrkar leh MZU chuan inremna thuthlung an lo ziak fel tawh a ni.
A bul tan nan CLIx hi Mizoram chhunga High School 30-ah kalpui phawt a ni ang a. Kum hnih chhungin sawrkar High School 200-ah kalpui hman vek tum a ni.
Vawiina CLIx hawnna hun hman a nih hnu hian, chawhnu lamah hemi kalpui dan tur chungchanga hriat tur leh tih tur pawimawh leh tulte inhriattir nan Headmasters’ Orientation programme hman zui nghal a ni bawk.
