Nimin (January 19, 2016) tlai khan Health Minister Pu Lal Thanzara hovin a office-ah Disaster Management Meeting pawimawh tak neih a ni a. Hunthar veng lei tla hniam leh Rangvamual leimin leh Venghlui lama leimin chungchang te sawi hovin, furpui thlen hmaa hma lak dan turte rel ho a ni a. He hunah hian Disaster Management & Rehabilitation Minister Pu C.Ngunlianchunga leh Aizawl DC Dr Franklin Laltinkhuma te bakah DM & R atangin Principal Secretary Pu P.C. Lallawmsanga leh Director Pu C. Lalpeksanga te, PWD lam atangin Engineer-in-Chief Pu Vanlaltluanga, Chief Engineer (Highways) Pu John Rammawia leh Chief Engineer (Buildings) Pu Lalmuankima Henry te an tel a ni.

Tlang rama cheng kan nih avangin leimin leh leitawlh theihna hmunah kan awm a; chhiatna thleng mai thei lakah kan inven a ngaiin kawngpui leh kan chenna vela tui-luan-kawrte a tha em tih en fel fo a ngaih thu Meeting kaihruaitu Pu Lal Thanzara chuan sawiin, fur ruahtui tlak hma ngeia hma lak a ngaiin a bik takin Hunthar Veng, Rangvamual leh Venghlui lam lei che thin hi ngaih pawimawh hmasak phawt a tul thu leh he’ng hmunahte hian chet laa siam tha tura sum hman tur ngaihtuah ho a tul thu a sawi.

Pu C. Ngunlianchunga chuan he’ng hmunte siam tha tur leh hma lak dan tur kawngah rilru sawr bingin ngaihtuah ho a ngaih thu leh tui-luan-kawr tha a pawimawh em em thu sawiin, he’ng lai ram awm dan ruangam a lo zir dan leh hmuh dan report a pe nghal bawk a ni.

Hunthar Veng lei tla hniam tun maia lo siam that nan PWD atangin Rs nuai 49 beisei niin, tun thla chhung ngeia hna thawh tan theih tum a ni a. Venghlui leimin thawm that nan hian Rs nuai 97 ruahman a ni nghal bawk a; Rangvamual kawng chei thaa zauh nan DM & R atangin a zualpui atana lo hman turin Rs nuai 20 ruahmanin, furpui hma ngeia bul tan tum a ni.

Meeting-ah hian DM&R-a Engineer-te’n he’ng lai hmun an en fiaha an hmuh dan leh a venna tur atana remruatna an siam report an pe bawk a. Chu chu member-te chuan sawi zui nghalin hma lak dan tura thate an rel ho nghal bawk.