Vawiin chawhnu khan Home Minister Pu R. Lalzirlaina kaihhruaiin a pisaah Coordination Committee on Traffic Management an thukhawm.

Meeting-ah hian nikum July 29-a Coordination Committee on Traffic Management in thu a lo rel bawhzuina an thlir let a. Home Minister chuan Traffic hotute leh midangte hmalakna chu tha a tih thu leh Krismas leh Kumthar vuakveta zu ruih vanga chesual emaw nunna chan an awm lo chu lawmawm a tih thu a sawi bawk.

Traffic jam ti ziaawm turin Aizawl a Taxi te chu March ni 1 atanga intlan chhawk hrih nise tiin meeting chuan a rel a. Hetih rual hian private motor-te pawh zirchiang a, intlan chhawk dan tur ruahmanna siam tha an tih thu an sawi. Pu R. Lalzirliana chuan public transport leh private motor-te bakah Minister-te thleng pawhin a tul a nih chuan intlan chhawk an inhuam thu a sawi tel bawk a ni. Traffic ti ziaawm tura Aizawl Municipal Corporation leh Aizawl Traffic-te thuneihna leh mawhphurhna semzai dan tur te sawiho niin, Aizawl hmun hrang hranga mihring kalna tur footpath leh pavement siam tawh leh siam belh ngaite ennawn a nih bakah kawngpui dunga inzuar thin Hawkers leh Street Vendors seng hawi chungchang meeting-ah hian sawilan a ni bawk.

Meeting-ah hian Line Bus mumal zawka khuahkhirh dan siam chu tha tiin, a khat tawka lirthei emission check nawn fo ni se, an ti a. Hunthar Veng-a lei tlahniam thawmthat dan leh Ngaizel Bus Stand tih thawl dan tur te pawh sawi nghal a ni.

Coordination Committee-ah hian member-te an kal tha hle a. Parliamentary Secretary Lt. Col Z. S. Zuala, Chief Secretary Pu Lalmalsawma, Aizawl DC, AMC leh Department aiawh hrang hrangte an kal khawm a ni.