Vawiin khan School Education Minister Pu H. Rohluna’n SCERT Multipurpose Building leh DIET Hostel Building, Chaltlangah a hawng.

Hawnna programme ah hian School Education Minister chuan thu sawiin vawiin hi DIET, Aizawl leh SCERT tana mellung pawimawh tak a ni, a ti a. Building tha, quality tha tak hman theiha a awm hi a lawmawm hle a ni tiin ruahmanna a taka chantirtu hnathawktute chungah lawmthu a sawi a. District hrang hrangah DIET Building thar hawn a nih thu a tarlang a. Zirna chungchangah hmasawnna ruhrel dinnaah hma kan la nasa a, zirna quality pawh a sang chho ve zel a ni, a ti a. Sawrkar laipui leh NEDP atanga sum hmuh hmangin Aizawlah Education Centre changtlung tak sak mek a ni, a ti a. Kan hnam dinchhuahna atan zirna lama hmasawn a ngai a, zirtirtute an nihna tur ang taka chherchhuah hi kan tihtur a ni tiin kalkhawmte chu a fuih a. Kan rama zirna tha kan neih theih nan zirtirtute hian mawhphurhna lian tak an nei a ni, a ti a. Zirlaiten an mamawh anga in kaihhruai theih nan rilru nei takin training hun in hman a ngai a ni, a ti a. Zirtirtute tan training hi a pawimawh telh telh dawn a, nakum lam atang chuan zirtirtuten training paltlang ngei ngei tura kalpui beisei a ni a, hei hian sawrkar leh mimal school pawh a huam a ni, a ti a. Kan state budget-ah pawh zirna atan pawisa tam tham tak dah a ni tiin hemi hmang hian  thalai chhawrtlak leh hmantlak chherchhuah bakah zirna lama nasa taka hmasawn tum a ni, a ti a. Hemi atan hian department atangin hma kan la nasa a, heng hmalaknate hlawhtlin nan hian zirtirtute an pawimawh hle a ni, a ti a. EDUSAT te, zirlai chungchanga video clip te tangkai taka hmang turin a chah a. An kal zelna turah duhsakna a hlan nghal a ni.

SCERT Multipurpose Building hi Rs. 175.68 lakhs a sak a ni a, March Ni 22, 2016 a sak tan niin January Ni 31, 2018 khan sak zawh a ni. Building hi chhawng nga a ni a, seminar hall, dining hall, quarters, dormitory leh lirthei parkna tur a awm a, rualbanlo ten an hman theih turin lift pawh ruahman a ni. DIET Hostel Building hi Rs. 198.49 lakhs a sak a ni a, January Ni 15, 2016 khan sak tan niin January Ni 6, 2017 khan sak zawh a ni a. Chhawng li a ni a, zirlaite room leh seminar hall a awm a ni. Centrally Sponsored Scheme atanga sak a ni a, NEDP atangin inchhung chei hna thawh a ni dawn bawk a ni.

School Education Commissioner & Secretary Pi Esther Lalruatkimi’n hawnna programme hi kaihruaiin kalkhawmte lawmna thu a sawi a. DIET Principal Pu Lalnuntluanga Hnamte chuan thusawina hun a nei a. PWD Project Division-I Senior Executive Engineer Pu Hrangthanga Zote chuan technical report a pe a. SCERT Director Pi Laldawngliani Chawngthu chuan lawmna thu sawiin hun a khar a. School Education Department, DIET, SCERT, PWD hotute, zirtirtute leh zirlaite an tel a ni.

 

Attachment

  • Loading attachment...