2437/2022-2023
Aizawl the 26th October 2022 : Vawiin khan School Education Minister Pu Lalchhandama Ralte chuan Serchhip leh Hnahthial-ah District pahnih huam chhunga zirlaite hnena chaw tha chawhpawlh pekna tur leh sports tihhmasawnna tur programme a hawng. Serchhipah hian BRC Hall-ah hawn a ni a, Hnahthialah hian Govt. Middle School-ah hawn a ni.

School Education Minister chuan Serchhip leh Hnahthial-ah hian Programme pahnih hawnnaah thu a sawi a. Sri Sathya Sai Annapoorna Trust Bangalore te leh Mizoram sorkarin inremna an neih angin District pahnih Serchhip leh Hnahthial te chu zirlaite hnena chaw tha chawhpawlh pek pilot project atan thlan a ni a ti a. Naupangten thla thum an ei hnuah naupang rih dan leh hriselna endik a ni ang a, danglamna a awm ngei beisei a ni a ti a. Minister chuan zirtirtute chu a bul tanna anih avangin ei dan tur ang taka naupangte pe tur leh a dose ngai pawimawh turin a chah.

Minister hian Serchhip leh Hnahthial-ah hian Sports tihhmasawnna tur Grassroots Level Sports Development Programme kalpuina tur a hawng nghal bawk a. Minister chuan Sports Association pangate nen thawhhona siam tawh a ni a, District 11-a centre 40-ah kalpui a ni dawn a, NEP 2020 in Sports hi zirna pangngai-ah a dah a, state sorkarin sports hi Industry-ah a lo puang tawh bawk a, chumi bawhzui nan chuan sports lama zirlaite dawmkanna tur programme hi kalpui a ni a ti. Minister chuan naupang talent nei tha te an zirna bakah eizawnna tha peka khawvel huapa infiamna lama Mizo thalaite phochhuah hi a tum a ni a ti bawk. Minister chuan School Education Department chu mihring chherna anih avangin department dang zawng zawng aiin a pawimawh a ni a ti a. Zirna sikula thawkte chu an thawhna theuh te mission field a ni tih hriaa zir tlak nun nei turin a chah a, khawvel than dan mila inbuatsaih tur leh an thawhna khawtlangin anmahniah chhiar tur an hmuh theih nan tan la turin a chah bawk.

Sri Sathya Sai Annapoorna Trust hi midangte tanpuitu an ni a, India ram state 23 leh UT 4-ah chaw tha pek hi an kalpui mek a, an chaw tha pek hi Sai Sure tih a ni a, Chaw tha chi hrang hrang chawhpawlh a ni a, naupang kum 6-16 inkarte tan an nitin eitur tha mamawh zaa 50 phuhruk thei tura ngaih a ni. District pahnihah hian naupang 2,000 ve ve an vaiin 4,000 te hnenah pek a ni dawn a. Mid-day meal belhchhah nan hman a ni dawn a ni.

Grassroot Level Sports Development Programme-ah hian Football, Hockey, Boxing, Badminton leh Weight lifting-ah te kalpui a ni dawn a ni. Spots Association ten coach tur an ngaihtuah ang a, Samagra Shiksha-in an hlawh a tumsak dawn a ni.

Heng Programme pahnih hawnna District-ah te hian School Education Department  District Education Office a thawk te, zirtirtute leh khawtlang hruaitute an tel a ni.