Vawiin khan Farkawn Higher Secondary School kum 15 tlin lawmna school campus-ah neih a ni a, School Education Minister Pu Lalchhandama Ralte-in khuallian niin a hmanpui a, Pu Ramthanmawia MLA chu khualzahawm a ni.

School Education Minister Pu Lalchhandama Ralte chuan he hunah hian thusawiin khawtlang hruaitute chu zirna inte bihchianpuia neitu nihna vawngnung tur te, zirtirtu zel thel te, aikal la leh awm tha duh lote an awm a nih chuan an bialtu officer hnena hriattir thin turin a chah a.  Nu leh pate pawh an fate zirnaah ngaihtuahna seng tam a, an tuipui tur mila an zir tur dapsak turin a chah a, in lamah pawh zirlaite chu enkawl uluk an tul thu a sawi bawk. Khawtlang hruaitute chu zirlaite zirna boruak tichhe thei zawnga thawm bengchheng siam lo tur leh zirlaite dinhmun zahsak fo turin a sawm bawk. Zirlai kalkhawmte chu fuihin  awmze neia tih tur hlenchhuak thin ten hlawhtlinna an chang thin a, dingchhuak turin midang aia taima nih a ngai a, tum bik neia, nih tum fel tak nei turin Minister chuan a chah bawk a ni.

He lawmna huna Khualzahawm Pu Ramthanmawia, MLA pawhin thusawiin Farkawn mipui kalkhawmte chu hmasawnna atana tangrual turin a sawm a, tupawh Mizoram sorkarah inthlahrung lova neitu nihna thinlung pu turin a sawm a ni. Dungtlang leh Farkawn inkar kawng leh Lamsial kawngte chu PMGSY sum hmanga siamthat tur anih thu a sawi bawk. MST bus chu Farkawn leh Khuangthingah service thartir a nih thu te, Farkawnah helicopter service tir tum a nih thu te a sawi bawk.

Pu C.Lalmuanpuia, MLA pawhin thusawiin Farkawn-ah 'Traveller's Inn' sak nan cheng nuai 100 ruahman a nih thu a sawi a, zirlaite chu hnam rohlu, ram nghahfak an nih avangin tan laa, zirnaah tih tak tak a hun ta hle a ni a ti a. Pathian tihna nen tan laa, beiseina eng nei turin a sawm bawk a ni.

Farkawn Higher Secondary School hi kum 2004 a din kha a ni a, kum 2005 atangin HSSLC result an nei tan a, kumin 2019 thleng hian zirlai 317 an pass chhuak tawh a, hemi hun chunga zirlai exam 375 an neih atangin zaa 84.53 in an pass a ni.

Farkawn HSS kum 15 tlin lawmnaah hian School Education Minister hi MLA pahnih Pu Ramthanmawia leh Pu C.Lalmuanpuia te bakah Pu K.Laldingliana, Additional Director, School Education, Pu Lalhmachhuana SPD, SSA & RMSA leh MNF General Hqs hruaitu thenkhatten an tawiawm bawk a ni.

Attachment

  • Loading attachment...