Lawngtlai RD Block hnuaia Mizoram State Rural Livelihoods Mission (MzSRLM) hma lakna enkawltu Block Mission Management Unit (BMMU) huaihawtin nimin (04.06.2019) khan Lawngtlai DC Conference Hall-ah ni li awh tur Livelihoods Village Entry Process and Revised Micro Credit Plan (MCP) Training chu Block Mission Director, Lawngtlai BDO ni bawk Pi Carolyn LB Khiangte MCS chuan a hawng.

Pi Carolyn LB Khiangte chuan Self Help Group (SHG) chu thingtlang nuho intel khawmin sawrkar tanpuina nghak hran lova mahni eizawnna tur ngaihtuaha hna an thawhna a nih thu sawiin, MzSRLM chu chuti ang pawl tanpui leh vil tura din a nih thu a sawi a. Nuho kal khawm chu sawrkarin tanpuina sum a pekte tlan zo nghal mai lo va, a peipun dan tur ngaihtuah tur leh eizawnna ngelnghet neih tuma tan la turin a chah.

He training hawnna hun hi Lawngtlai Block Mission Manager (BMM) Pu R. Zodinsanga'n kaihruaiin, Lawngtlai BMMU hma lakna leh dinhmun tlangpui a sawi a. Serchhip District atanga training enpuitu District Functional Specialist (DFS) Pu Vanlalmuanpuia pawhin thu sawiin, SHG dintu nute chu mahnia inhai kaw thei an nihzia inhre chiang a, zam lo leh eng mah huphurh nei lova thawk zel turin a fuih a. Serchhip District-a MzSRLM hma lakna hlawhtlin dan tar langin, Lawngtlai District pawhin chu chu an ti ve thei tih hre turin a chah bawk.

He training-ah hian Lawngtlai RD Block huam chhunga khaw 23 atanga SHG thlan chhuah cadre hrang hrang - Agriculture Community Resource Person (A-CRP), Livestock CRP (L-CRP), Bank Facilitator (BF), Financial Inclusion Cadre (FI-Cadre) leh Community Facilitator (CF) atana ruat mi 70 an kal khawm a. Training hi thuang hrang hrangin June ni 4 atanga ni 7 thleng neih tura ruahman a ni a. Training-ah hian MzSRLM-in hma a lakna khuaa chhungkaw tinin eizawnna ngelnghet leh innghahna tlak an neih theih nan ruahmanna hrang hrang pawh duan tum a ni.

 MzSRLM hi Mizoram thingtlang khuaa mi retheite’n Self Help Group (SHG) hmanga mahni inhai kuaa eizawnna nghet an neih theih nana hma lakpuina a ni a. Kum 2013 April ni 22 khan Mizoramah tan niin, Lawngtlai District-ah chuan July ni 26, 2016 khan tan a ni a. Lawngtlai RD Block huam chhunga khaw 31 awmah khaw 23-ah SHG hi din tawh niin, luh hmabakna khaw 8 a la awm a. Lawngtlai Block chhungah hian tun dinhmunah SHG 215 din tawh niin, SHG member 2150 an awm mek a ni.

SHG-te hi start-up cost Rs 2500/- pek thin an nih bakah, a ti tha deuhte chu revolving fund Rs 15,000/- pek thin an ni a. Lawngtlai Block chhunga SHG 160 chuan revolving fund hi an hmu tawh bawk a ni.