Vawiin khan School Education Minister Pu Lalchhandama Ralte chuan Govt. Chalrang Middle School Golden Jubilee a hmanpui.

Pu Lalchhandama Ralte chuan he hunah hian thusawiin Chalrang Middle School-in Golden Jubilee an lawm thei chu a lawmpui thu a sawi a. He school atanga mi hlawhtling tak tak lo zir chhuak tawhte, Chalrang khaw chhuak mi hlawhtling tak tak an awm thu sawiin vawiina zirlaiten an hnung zui se a duhsak thu a sawi. Minister Zirna, hriselna leh kawngpui te chu sawrkarin a ngai pawimawh deuh bik a ni a ti a. Heng thil pathum te hi a rualin an pawimawh dan a inang tlang vek a. Kawngpui tha tak tak awm se, hriselna tha nei mah ila, zirna a tlukchhiat chuan hmasawnna tluantling lo a ni ang. Chuvangin, Sorkarin zirna siamthat nan zirtirtu tihchak a ngai tih a hria a, hun reilote chhungin zirtirtu sang chuang lak an ni tawh a, zirna building tla bal tawhte pawh a tah tawlin siamthat hna thawh tum a ni a ti a. Heng bakah hian curriculum te pawh a tul anga siamthat zui tum a ni a ti.

Minister chuan Mizoramah zirna a tlahniam nasa hle tih sawiin a vei thu a sawi a. Kawng hrang hranga tan lakna tur a tam a, zirna hian hmun sang chang leh sela, zirlaite hi kan ram nghahfak an nih avangin khawtlangin i duat thar ang u a ti bawk a ni. Khaw hrang hrangah zirna in leh compound te thildanga hman atan khawtlangin an it deuh mai zel a. Khawtlang hian neitu thinlung puta humhalh a tul a, heti lama pianthar hi a tul hle a ni a ti a. Mizoram a Zirlaite chu India ram hmun dangah pawh zahpuiawm lo an nih a, mahni inrintawkna nena khawvel an hmachhawn theih a ngai a, chutiang tura inchherchhuah pawh a ngai a ni a ti.

Chalrang Middle School hi January 16, 1970 khan din a ni a. Govt. Chalrang Middle School Golden Jubilee lawmnaah hian Headmaster hmasa ber Dr H.Vanlalhluna pawhin thusawina hun hmangin bul an tan dan leh nasa taka hma an sawn chhoh thuai dan te bakah an hlawhtlinna a sawi bawk a ni.

Govt. Chalrang Middle School Golden Jubilee lawmnaah hian Pu L Thangmawia MLA leh Vice Chairman, Human Resource Development Board, Pu C.Lalnunthanga, Executive Member, SHD, Pu K.Sangthuama, Joint Secretary, Pu Lalhmachhuana, SPD, Samagra leh School Education Department officer dangte pawh an tel a. He school a Headmaster lo ni tawh te, he school a thawk tawh te, zir chhuak tawh te, khawtlang mipui leh zirlaite bakah he School a zir chhuak mi hlawhtling engemawzat an tel bawk a ni.