School Education Minister Pu H. Rohluna chuan vawiin khan Hnahlan a school hrang hrang pasarih tlawhin zirtirtute nen inkawmna hun a nei a. Champhai DC Pu Vanlalngaihsaka bakah Champhai District-a Education, Rural Development leh Department danga Officer thenkhat ten Minister hi tawiawm in, vawiin vek khan  Minister hian team 14 inelna Thanglianthuama Memorial Football Tournament hmasa ber tur, Hnahlana buatsaih chu a hawng nghal bawk.

Minister chuan School zirtirtute nen uluk taka inkawmna hun a neih bakah Education lama Official-te nen harsatnate sawiho a ni a. Zairlaite hmaah thusawina neiin School Education Minister chuan hmasawnna intanna bul chu kan thinlung ngaihtuahna a ni a, chu ngaihtuahna dik leh tha leh tangkai siam tur chuan zirna tha a pawimawh a ni, a ti a. Zirna tha zawk leh hmasawnna kan neih theih nan kalphung thenkhat thlak a, siamthat a awm thu te, zirtirtu dah nghet engemaw zat an awm tawh thu te a tarlang a. Minister chuan zirlai te nunah faina leh thianghlimna chu bet se a tih thu sawiin, tirh vang ringawta an bul vel tihfai mai lovin, khawtlangah pawh lang chhuak se, chu chu zirtirna tihlawhtlingtu pakhat a ni dawn a ni, a ti.

Minister Pu H. Rohluna chuan ramri hrula insumdawn tawnna tur Border Haat siam tum mek zingah Hnahlan pawh a tel thu sawiin, chak zawka hmalak a nih theih nan Sorkar laipuiah pawh nawr mek a nih thu a sawi a. Kan ramah hian tunah langsar takin hmasawnna hi kallo mahse kawng hrang hrangah hmasawnna a awm zel a ni, a ti a. Minister chuan kan ramin industries lian tha tak emaw ram pum huap sumdawnna emaw, innghahna tham kan la neilo chungin kan neih tawk hi khairual leh tangkai thei ang bera hman chu kan tum leh, Sorkar hruaitute leh mipui lam pawhin kan mawh tlan a ni, a ti.

Football Tournament hawnna inkhawm buatsaihah Minister chuan team tel zawng zawng hnenah Football a pe a. Sorkar-in infiamna a ngaihpawimawh avangin hmunhma tha zawk siama hma a lak nasatna chuan rah a chhuah mek thu Minister Pu H. Rohluna chuan sawiin, Mizoram pawn a inkhel a sum thahnem tak lalut thalai zingah an pung zel a ni, a ti a. Chutihrual chuan infiam miten an nun uluk a, hriselna kawngah pawh invawng reng turin a chah bawk.

He hunah hian Champhai DC Pu Vanlalngaihsaka chuan inkhel turte chu pakhatna nih tuma theih tawp chhuah tura a duhsakna a hlan bakah, inelna thianghlim tak rilru pu theuh tura a duh thu a tarlang a ni. Champhai District Football Association President leh Deputy DPC (RMSA) ni bawk Pu C. Hualrikhuma chuan thu a sawi bawk.

Vawiin hian Minister ho hian Govt Middle School, Govt. P/S-I, Govt. P/S-II, Presbyterian English School, Govt. Hnahlan High School, Govt. Hnahlan Higher Secondary School, leh Mizoram State Middle School-te tlawh a ni a. School hrang hrang henah hian football a sem theuh bawk.