Vawiin chawhnu khan Holy Angels School kum 25 tlin lawmna inkhawm an school Auditorium-a neih chu School Education Minister Pu H.Rohluna’n a hmanpui.

Pu H.Rohluna chuan Catholic kohhranin Mizorama education hmasawnna tura a thawhlawkzia sawiin hmun kilkhawr zawk thlenga luhchilha zirna hmanga hna an thawh nasat avangin lawmthu a sawi a. Mizorama zirlaiten zirna tha quality education an hmuh theih nan sawrkar chuan hma a la a, kum danga awm ngailo thil thar pawchhuakin a thalo lai nia an hriat te an siam tha mek zel a, naupang taima ten percentage sang zawk an hmu theih nan marks endik dan thar Integrated Evaluation Scheme kum 2016-17 atanga atangin hman tan a ni, a ti a. He IES-ah hian internal assessment atan mark 20 dah a ni a, mark 20 kan pek danah Mizoram pumpuia rualkhai tak leh rintlak taka kan kal theih nan MBSE-in kaihruaina a duang sa a ni, Minister chuan a ti. Nu leh pate fuihin Pu H.Rohluna chuan an fate zirna kawngah hun leh tha seng a, zirtirtute kuta dah tawp lo turin a fuih a. Holy Angels School hmasawn zelna turin duhsakna a hlan bawk.

February ni 14, 1991 khan Holy Angels School hi Most Rev. Denzil Reginald D’Souza, Bishop of Silchar hova din niin Principal hmasa ber chu Rev.Father.S.Michael a ni. St Pauls Parish leh Sisters of the Little Flower of Bethany tangkawp chuan he school hi enkawlin elementary chin hi tun dinhmunah deficit a ni a. High School section hi kum 2012 ah hawn belh niin class-X tum hnih an exam tawhah zirlai zawng zawng an passed vek a ni.

Holy Angels School silver jubilee lawmna inkhawmah hian Most.Rev.Stephen Rotluanga CSC, Bishop of Aizawl pawhin thu a sawi a ni.