Vawiin hian Lawngtlai Hospital Complex a National Tobacco Control Programme (NTCP) Office ah zuk leh hmuama harsatna nei leh a nghei duhte tanpuina tur Clinic (Tobacco Cessation Clinic / TCC) chu Chief Medical Officer, Dr. HC Thangkima’n a hawng.

Dr. HC Thangkima chuan, Lawngtlai khawpui leh District chhungah zuk leh hmuam ti an la tam thu sawiin chu chuan kan hriselna te, kan thawh theihna te, nasa takin a tihniam a, sum leh paia kan dinhmun te, kan damrei zawng turte, kan fate lo piang zel tur dinhmunte thlengin a derthawn phah a, zuk leh hmuam vangin kan ram hi din hmun hlauhawm takah kan dah a ni, a ti a. Mipuite chu heng min tihnawktu thilte lak atanga fihlim tum tur leh anmahni tanpuitu tura din Tobacco Cessation Clinic chu hmang tangkai turin a sawm a ni.

Nl K. Hmingthansangi, District Consultant, NTCP Lawngtlai District pawhin thu sawiin Tobacco Cessation Clinic kalphung tlangpui hrilhfiahna a nei a, zuk leh hmuam eng chi pawh a harsatna nei leh nghei tumte tan Hospital OPD hun chhungin pan theih anih thu sawiin Behavioural Counselling na hmun te, Nicotine Replacement Theraphy (NRT) leh Non-Nicotine Replacement Theraphy tihna hmunte a nih nghal thu a tarlang bawk.

He Clinic thar hawnna inkhawm, Dr. Zothanpari Chhakchhuak, District Nodal Officer (NTCP) kaihhruaia neiha hian Pu T. Chalnghingluaia, Art & Culture Officer, LADC leh District Anti-Tobacco Squad Member ni bawk chuan Clinic thar hi Pathian hnena hlanna a nei a ni.

Attachment

  • Loading attachment...