2468/2022-2023
Aizawl the 28th October 2020 : Vawiin khan 19th Higher Secondary School Games 2022 chu khar a ni ta a. Kharna inkhawm Vanapa Hall-a neih ah Education Minister Pu Lalchhandama Ralte chu khuallian a ni.

Minister chuan thusawiin NEP 2020-in sports hi a ngaih pawimawh avangin zirna kara tlazep ni mai tawh lovin subject dang ang bawka pawimawh a ni tan dawn, a ti a. A bul tan nan elementary school 40-ah Grassroot level-a kalpui a ni dawn a, district hrang hrangah heng sports zirna tur centre hi thlan fel tawh niin kum tharah school tam zawkah huang zauh zel tum a ni tih a sawi.

Minister chuan School Games chu inunauna leh inthian that nan zirlaiten hmang se a duh thu a sawi a, zirlaite chu an zirna tibahlah thei ruihhlo laka inthiarfihlim turin a chah a, infiamna hian ruihhlo ti ve lo turin rilru dik puttir se a duh thu a sawi bawk a ni. Minister chuan social media lamah thumal dik mang lo leh tawngkam chaltlai hman a tam thu sawiin zirlaite chu heng kawngah hian fimkhur tur leh aia upate zahna lantir a, Mizo nun ze mawi lantir fo turin a chah a ni.

HSS Games-ah hian Aizawl khawpui chhung Higher Secondary School 14 leh Aizawl khawpui pawn school 12, an vaiin school 26 an tel a. Infiam mi zirlai mipa 473, hmeichhia 338 leh lecturer 109 an vaiin 920 an tel a. A pumpuia school titha ber, champion chu Govt. J.L.Higher Secondary School niin Gold 4 leh Bronze 1 an la a ni.

Best Athlete(Girls) chu Elisian Meidaii, Baptist HSS Serkawn a ni a, Gold 3 a la a, Best Athlete (Boys) chu Lalmuansanga, Govt JL HSS a ni a, Gold 4 a la a ni. Badminton (Boys)-ah St. Pauls HSS an champion a, Badminton (Girls)-ah Govt. Mizo HSS an champion bawk. Football (Boys)-ah Govt C.Zakhuma HSS, Kolasib an champion a, Volleyball (Girls)-ah Khawzawl HSS an champion bawk a ni.

Vawiin HSS Games kharna hun hi School Education Secretary Dr Lalzirmawia Chhangte-in a kaihruai a, School Education Department-a officer te, HSS Principal, Lecturer leh zirlaite an kalkhawm a ni.