Tukin zingkar khan School Education Minister Pu H.Rohluna chuan Dinthar veng Govt Primary School-I, IAS Coaching Centre atana chei that mek chu a hmunah kalin a en a. Mizoram Youth Commission (MYC) Chairman Pu T.Sangkunga leh a thawhpuite’n an hna kalpui dan leh hmasawn dan te an lo hrilh fiah a ni.
Minister Pu H.Rohluna chuan MYC Chairman leh a thawhpuite hnathawh lawmawm tiin, Mizorama IAS Coaching Centre changtlung tak kan neih theih nana an hma laknaah a fak a; a building tur an ruahman pawh chu tha thawkhat hlea a hriat thu a sawi bawk. Minister chuan Mizo thalaite zingah lehkha zir peih deuh tura ngaih, a ngaihna hre si lo an tam a, mahnia bei fat fat peih an tlem thin hle a. He IAS Coaching Centre din tur hian thalaiteah harh tharna thlenin, IAS eng emaw zat a chher chhuah ngei a beisei thu sawiin Minister chuan Assistant Exam-a tlate pawh MCS-ah te an tling leh thei a ni tih hriaa thahnem ngaihna leh tumruhna tak tak nena zir a pawimawh dawn hle a ni, a ti.
Minister tawiawmtu Parliamentary Secretary Pu Joseph Lalhimpuia, School Education changtu chuan Education Department-in zirlaite leh thalaite hmakhua a ngai a; state chhungah chauh ni lo ram pum huap pawha Mizo thalaite’n hna pawimawh an chelh ve theih nan MYC hma laknaa Mizorama IAS Coaching Centre din tur pawh hi tha a ti hle tih sawiin Dinthara sawrkar Primary School-I leh II te pawh amalgamate-a, P/S-I building pawh IAS Coaching Centre dinna tur atan hian phal taka pek an ni, a ti a. He Centre din tur hi zirlaite leh thalaite’n tangkai taka an hman a, Mizoramin hma a sawnpui ngei a beisei thu a sawi bawk.
MYC Chairman Pu T.Sangkunga chuan IAS Coaching Centre dinna tur hmun remchang tak mai School Education Department-in MYC an pe chu lawmawm a tih thu sawiin, an hma lak dante a sawi fiah nghal a. Sikul building hlui chu luah nghal mai theih tur nia an ngaih laiin, rin aia chei that ngai a lo tam avangin tum anga an peih fel hma theih loh thu sawiin, rei lo teah peih fel thuai tum a ni, a ti a. He Coaching Centre din tur hi India rama tha bera ngaih, Alternative Learning System (ALS) outsource tur niin, a hmunhma peih fel a nih veleh class pawh tan nghal tum a ni, a ti a. Excel Classes, Delhi te nen tang kawpin Staff Selection Commission Exam Coaching Class pawh hawn nghal tum a nih thu te, Skill Development project kalpui tur atan pawh hostel tur en fel mek a nih thu leh tuna sipai lak runpuia physical paltlanga written test hmachhawn turte tan MYC chuan a thlawna coaching class pek a tum thu Chairman chuan a sawi bawk.
IAS leh SSC Coaching Centre atan hian Govt Primary School-I, Dinthar building chu chei that mek a ni a. VSAT hunna tur bakah a school building a hlui tawh avangin nasa taka siam that a ni a, pawnlam thawmin zirlaite a tihbuai lohna turin soundproof-a siam mek a ni bawk. IAS Coaching hi 1 year Course (Prelims + Mains + Interview) tur a ni a. Course fee hi mi pakhat tan Rs 80,750 niin, sawrkarin Rs 60,000 a tum ang a, Rs 20,750 chu zirlai tum tur a ni. Course khatah hian seat 100 awm tura ruahman a ni bawk.
SSC Coaching hi 3-4 months Course tur a ni a. Course fee hi mi pakhat tan Rs 12,000 niin, sawrkarin Rs 9,000 a tum ang a, Rs 3,000 chu zirlai tum tur a ni. Course khatah hian seat 200 awm tura ruahman a ni thung.
Skill Development atan hian MYC Office Ground Floor-ah classroom tur ruahman a ni a. 6 months Course tur niin, seat 400 awm tura ruahman a ni a. Hei erawh hi chu Northeast pum huap tur niin, hostel tur pawh ngaihtuah mek a ni bawk.
Minister hi Parliamentary Secretary Pu Joseph Lalhimpuia te, MYC Chairman Pu T.Sangkunga te, School Education Secretary Pu P.Lalchhuanga te, School Education Director Pu K.Lalthawmmawia te, MYC leh Education lam hotu dang te, MZP hruaitu te, Dinthar veng Local Council leh YMA lam aiawh te’n an tawiawm a ni.
