India ram puma zirna leh thiamna intluktlang leh thiamna inrualkhai zawk elementary level-a alo awm theih nan National Council of Educational Research & Training (NCERT) in a duanchhuah, “Learning Outcomes” (thiam ngei tur bituk) chu nimin khan SCERT Auditorium-ah tlangzarh a ni a. He hunah hian School Education Minister Pu H. Rohluna chu khuallian niin, Learning Outcomes hi a tlangzarh bakah Elementary School zirtirtute training pek a nih tur thu a puang a, training pe tu turte zirtirna “Training of Trainers” chu a hawng nghal bawk. He hunah hian Parliamentary Secretary Pu Joseph Lalhimpuia chu khualzahawm a ni.

School Education Minister chuan chuan Learning Outcomes pawimawhna sawiin, thiamtir tur bituk mai bakah zirtir dan tur thlengin a huam tel avangin zirtirtute tan he Learning Outcomes hi kawng kawhhmuhtu leh kaihruaitu pawimawh tak a nih bakah nu leh pa te tan thleng pawhin a tangkai dawn a ni, a ti a. Learning Outcomes bu, NCERT-in English-in a publish chu SCERT-in Mizo tawngin a lo let vek chu lawmawm a tih thu a sawi bawk a. Nu leh pa ten an fate zirthiamtur an lo hriat ve nan ‘brochure' nu leh pa te sem tur te hial buatsaih a nih chuan awlsamna a siam tur thu a sawi a. He Learning Outcomes hian zirtirtute hnathawh that leh thatloh tilangtu tur a nih theih thu a sawi bawk.

Minister Pu H.Rohluna chuan National Programme chak taka lndia ram dung leh vanga kalpui mek “Training of Untrained Teachers of All Elementary Schools” chungchang sawifiahin, RTE Act, Section 23(2) Amendment-in elementary school-a zirtirtute train theih hun 3lst March 2019 thleng pawtsei tura rawtna a siam chu Parliament in a pass tawh thu a tarlang a. Hei hian zirtirtu training la nei lo te tan training neihna hun tha tak a siam a ni, a ti. Eng zirtirtu pawh, Govt./ Govt. Aided/ Private Unaided School-a thawk zawng zawng te pawh tiamin RTE Act 2009-in a phut qualification nei lo chu 1st April, 2019 hnu lamah tumah zirtirtuah an tang zui theih dawn tawh loh avangin he hun tha hi rang taka bawhzui turin Minister chuan zirtirtute a chah a. Hun a ral hnu a hreh tak chunga inban ngai tumahin an hmachhawn loh nan Ministry of Human Resource Development lamin ruahmanna a siam angin National Institute of Open Schooling (NIOS) hnuaiah Open distance Mode in D.El.Ed hi zir a thieh thu a sawi a, School Principal leh Head ten hemi chungchang hi Nodal Department, SCERT lamah an ngaihven thuai a beisei thu a tarlang a. Zirtirtu training paltlang tawh ten zirtirtu hnaa an let leh hian an hnaah ‘trained’ an nihna chu lang zel se a tih thu a sawi bawk a ni.

Pu Joseph Lalhimpuia chuan fuihna thu sawiin, tun hniah India rama Education-in hma a sawn theihna turin hmalakna tam tak a kal mek zel thu leh, India ram puma naupangte thiam chin inang lo lutuk a lo ruaikhai theih zawk nan NCERT buatsaih Learning Outcomes hmang a ni tur hi a lawmawm hle a ni, tiin, rah tha a chhuah ngei a beisei thu a sawi a. Naupangte thiamna tehfung atana hman pawimawh tak pakhat, India ram puma NCERT-in a siam thin National Achievement Survey pawh tun November thla hian Class III, V leh VIII-ah conduct turin Mizoram pawh kan inpuahchah mup mup thu a sawi a. Achievement Survey result hma lam atangin India ram naupangte thiamna inan lohzia a lan chian thu sawiin, vawiina tlangzarh tak Learning Outcomes hian ram pumah rualkhai zawkin naupangte zirna leh thiamnaah nghawng tha tak a neih ngei tur thu a sawi a. Naupangte hian school a kal hi nuam an ti em tih te kan inzawh a ngai a ti a, thil tamtak thiam chung si hian zirna in a tum tak ‘a laimu’ hi kan luhchilh em tih kan inzawh theuh a tul a ni, a ti bawk.

Khuallian hian SCERT Conference Hall thar a hawng nghal bawk a. Elementary School zawng zawng a hman nghal a nih theih nan District tina DIET (8) atangin Principal leh Faculty poll (4) theuh te tan District Resource Persons Training neih zui nghal a ni dawn a ni.

Programme hi School Education Department Commissioners & Secretary Pi Esther Lal Ruatkimi chuan a kaihruai a. He inkhawm hi Education Department-a thawk mek ten an chhim a, Office lama thawkte leh School lama thawkte bakah District hrang hrang a awm te an tel a ni.