1098//2023-2024

Lunglei the 11th July, 2023 – Vawiin khan School Education Department changtu Minister Pu Lalchhandama Ralte chuan Samagra Shiksha 2020-21 fund cheng nuai 327.432 senga ruahman DIET Lunglei Academic Building thar a hawng.

Hawnna inkhawm Pi Laldawngliani Chawngthu kaihhruaiah Minister Pu Lalchhandama Ralte chuan DIET Lunglei Academic Building thar tha tak neih theihna tura theihtawp chhuahtu School Education Department official-te leh a sak hna tha taka thawk tu Allied Concern te chungah lawmthu a sawi a. Mizoramah zirna a hmasawn zel theihna turin School Education Department chuan nasa takin tan a lak mek zel thu sawiin National Education Policy (NEP), 2020 in a duang angin school a zirna chu a bulthut atanga siam that hna tawh mek zel a ni a, SCERT hmalaknain elementary education tih hmasawnna turin Early Childhood Care and Education (ECCE) lamah theihtawp chhuah niin textbook leh syllabus te pawh siam that mek anih thu a sawi a. Zirlai thangthar te pawhin Mizo hnam ziarang leh kan history te tun aia anlo hmelhriat zawk theihnan School Textbook-te pawh siam rem chhoh mek zel anih thu a sawi a. Government Adhoc Aided School te upgradation tur chungchangah pawh School Education Department chuan hma a lak mek thu Minister chuan kalkhawmte a hrilh bawk a ni.

Kan rama zirna kan siam that dawn chuan zirtirtute training-na hmunpui DIET-ah bul kan tan a tul a ni tiin Minister chuan DIET Lunglei Academic Building thar chuan an hnathawhna leh an zirna ah te nghawng tha tak a neih ngei a beisei thu a sawi a. Tun dinhmuna Mizoram DIET pariat awm mek te bakah hian DIET Hnahthial leh Khawzawl te pawh ruahman tum mek anih thu a sawi a. DIET Lunglei thawktu leh zirlaite chu thahnemngai taka thawk tur leh ram leh hnam hmasawnna tura hmathlir nei turin a chah bawk a ni.

He huna khualzahawm Lunglei High Powered Committee Vice Chairman Pu Lawmawma Tochhawng pawhin thu sawiin Lunglei mipuite, a bik takin zirtirtute leh zirlaite tana ruhrel pawimawh tak mai DIET Lunglei Academic Building thar tha tak peih fel a nita chu lawmawm tiin School Education Minister leh a thawhpuite chungah lawmthu a sawi a. DIET Lunglei chu midang tana malsawmna thlentu, leh ram leh hnam tana mi tangkai chherchhuaktu an nih thu sawiin Academic Building thar chu khawng hrang hranga hmasawnna thlentu anih ngei a beisei thu a sawi a ni.

Vawiin program ah hian Lunglei DC Pi Ramdinliani pawhin thu sawiin, Pu H Lalhruaitluanga, Additional State Project Director, Samagra Shiksha Mizoram chuan report a pe a, DIEP Lunglei Pricipal Pi V. Lalliansangi chuan lawmthu sawina hun a hmang a ni.

DIET Lunglei Academic Building thar hi Samagra Shiksha 2020-21 fund cheng nuai 327.432 senga ruahman niin Allied Concern ten an thawk a. 23rd February, 2022 khan thawh tan niin 22nd June, 2023 khan thawh zawh a ni a. Ground Floor, 1st Floor leh Second Floor te awmin a zau zawng hi 1273.71 square metres a ni. A building ah hian Classroom pasarih (7), Faculty Room pahnih, Store Rooom pahnih, ICT & Edusat Room, Seminar & Conference Room, Girls Commom Room, Boys Common Room, Multipurpose Hall, Arts & Craft room, Health & Physical resource room leh bathroom engemawzat a awm a ni.