2012/2023-2024

Vawiin khan School Education Minister Pu Lalchhandama Ralte chuan Govt Mizo High School-in thiam thil chi hrang hrang entirna an school compound-a an buatsaih ‘Thul 2023’ a hawng.

Minister chuan ‘Thul 2023’ hawnna inkhawm Govt Mizo High School hall-a neihah thusawiin Govt. Mizo High School-in zirlaite thiam thil tha tak tak phochhuahna a buatsaih chu lawmawm a tih thu a sawi a. Mizote hi talent nei tha tak kan ni tih sawiin National Level Skill competitionah pawh Mizoram-in lawmman pathum kan la a, India hmarchhak huap inelnaah phei chuan sawm chuang kan la thei a, tunah hian khawvel pum huap skill competition-a tel tumin sorkarin hma a la mek a ni a ti.

Pu Lalchhandama Ralte chuan NEP 2020 hian zirna pangngai leh skill development hi a kaikawp vek a, hemi mil hian zirna kalpui dan tur pawh ruahman a ni a, School bag ah loh ni te pawh siam a ni a ti. Minister chuan ram changkangho hi skill-ah an sang a, Pathianin talent a pek te peipunga pho chhuak tura an beihna a ropui thei hle a ti. Thul 2023-a zirlaite thiamna pho chhuah chuan eizawnna tlaka thiamna nei turin a pui zel ang tih a beisei thu a sawi bawk.

Minister chuan Pathianin Mizo hnam nihna min pe a, Mizoram min pe, kan hnam tih dan leh nunphung chhawm chhoh zel min pek te, tawng min pek te tihausa turin sorkarin tan a la mek a ni a ti a. sikula ‘Ro min relsak ang che’ tih hla sak thin tura tih chu naupangte thinlunga Mizo hnam nun leh hnama min siamtu Pathian nena inthlunzawmna pawimawh tak a ni a ti. Kan hmasawnna hian hnam ziarang leh nunphung chhawm chhoh zelte kalsan lo se a duh thu sawiin ram leh hnam zahpui lo turin zirlaite a chah bawk.

Minister hian School website www.mizohighschool.edu.in a hawng nghal bawk.

Mizo High School Thul 2023 hawnnaa khualzahawm School Education Director Pu Lalsangliana pawhin thusawiin he thul exhibition hi thiamna a hun taka hmang chhuak thei tura puitu ni thei se a duh thu sawiin quality education nei turin mahnia tihchhin peih a ngai a ni a ti a, zirlaite chu thiamna tak tak nei turin a fuih bawk.

Govt. Mizo High School Thul Exhibition 2023-ah hian zirlaite thu leh hla ziah tarlanna Ink on paper tih chu Pu Lalchhandama Ralte-in a tlangzarh a, Pu Lalnunpuia Hrahsel lehkhabu ziah ‘Englo’ tih chu Pu Lalsangliana School Education Director-in a tlangzarh bawk.

Thul Exhibition hawnnaah hian School Education Minister leh Director te bakah Aizawl DEO Pu Lalramthianghlima te, Govt Mizo Higher Secondary School Principal, Headmaster, zirtirtute leh zirlaite an tel a ni.