Vawiin khan Mount Carmel School-in an School atanga HSLC leh HSSLC Examination 2019-a top tena tlingte leh an school chhuak MCS tling chawimawina hun Vanapa Hall-ah an hmang a, School Education Minister Pu Lalchhandama Ralte chu khuallian niin a hmanpui.

Khuallian Pu Lalchhandama Ralte chuan thusawiin Mount Carmel School-in mi hlawhtling thahnem tak a chher chhuak chu fakawm a tih thu a sawi a. School din tirh kum 1988 atanga kum 32 chhunga HSLC candidate an neih tawh 2799-ah 3 chiah an hlawhchham a, 2796 te an hlawhtling thei chu chhuanawm a tih thu a sawi. Minister chuan zirlai kalkhawmte chu tum mumal tak neia lehkha zir turin a chah a, mi sawi apiang tum chawp mai ni lo, mahnia tum bik nei tlat tura fuihin, ram leh hnam mamawh chhanna ni turin a sawm a ni. UPSC Exam-ah Mizo an tling tlem te, Central sorkar office pawimawh luah tura Mizo an tlem ta chu ngaimawh tham a ni tawh a, hna pawimawh leh sang chinah Mizo thu tur an awm lo mai dawn a, hei hi hnam angin a mualphothlak dawn a ni tiin zirlaite chu heng hna pawimawh luah thei tur khawpa tan la turin a chah a ni. Minister chuan khawvel intlawhpawhna a tha chho zel a, khawi hmunah pawh awm ila, Mizote chuan Kristianna rilru pu renga Mission thinlung pu chunga hna thawk a ngai a ni a ti a. Khawi hmunah pawh miten Mizo chu an rinawm, dawt an sawi ngai lo tia min hriat theih nan Mizo nihna tarlangtu nih theuh ila, sumdawnna leh thil dangah pawh chim ral kan nih loh nan hnam thinlung pu chunga taimak chhuaha, mahni inthunun a ngai a ni a ti bawk.

Mount Carmel School ten HSLC leh HSSLC Examination 2019-a an school atanga top tena tlingte leh subject mala mark hmu sang berte chawimawina hun an hmanah hian an school zirlaite, zirtirtu te leh nu leh pate an tel a, an School atanga zir chhuak tun hnaia MCS a tling Pu H.Lalramenga chawimawina hun an hmang bawk.