Vawiin khan Samaritan Association for the Blind buatsaihin Special Blind School, Durtlang Venglai-ah HSLC 2019 -100% Result lawmna hun hman a ni a, Pu Lalchhandama Ralte, School Education Minister chu khuallian niin a hmanpui.

Khuallian Pu Lalchhandama Ralte chuan mitdel zirlaite chu mihringte ngaiha vanduai ang dinhmuna ding ni mahse, anmahnia theihna Pathianin a dah chu a ropui em em a ni tiin kumina HSLC tha taka pass - R.Lalmuanpuii leh Lalnunmawii te pawh chhuanawm a tih thu leh a lawmpui takzet thu a sawi. He School bul tantute leh zirtirtute inpekna chu ropui a tih thu sawiin Minister chuan rualbanlote tan sorkarin thil hrang hrangah hamthatna (reservation) a siam a, hetah hian a theih chin chinah tih theih a awm chuan tanpui a inhuam thu a sawi a. Mit khaw hmu fiahte tih theih ang tih ve theih zel tuma Pathian hmangaihte an ni tih inhriaa hnual lova tumruhna leh taihmak chhuah zel turin zirlaite a fuih bawk. Minister hian Special Blind School-a  Braille Press tihnun a nih theih nan UPS lian pek a nih tur thu a hrilh bawk.

Special Blind School hi kum 2001 khan Samaritan Association for the Blind hruaitu Pu R.Thanga(L) leh Pu Arsiliana ten an din a ni a. Mitdel leh khaw hmuh fiah lote tan Class I atanga Class X thleng zirna a awm a, a din tirh atangin HSLC pass 24 an awm tawh a, tun dinhmunah zirlai 30 leh zirtirtu 11 an awm mek a, zirtirtu zingah hian Mitdel zirtirtu 1 a awm a, B.A zirlai pahnih an awm mek bawk.