48/2022-2023

Aizawl, the 5^th April 2022: Vawiin atangin a dan pangaiin zirna in te hawn a ni leh tawh a. Hemi chungchangah  hian Ținghmun, Upper Sakawrdai leh Vaitin a tlawh a zin mek, School Education Minister Pu Lalchhandama Ralte chuan hripui avanga zirna khaihlak chu ramin a tuar loh nan theihtawpa țan la turin khawtlang hruaitute, nu leh pa leh zirtirtute a sawm a ni.

Minister chuan hripui avanga kum 2 zet sikul khar anih tawh hnuah vawiina sikul hawn a lo ni ta  leh zirlaiten sikul an pan leh thei ta chuan a tihlim hle tih a sawi a. Zirlaite leh zirtirtute a lawmpui tih sawiin sikul kal theih loh chhung hian zirna chu online leh kawng danga kalpui ni mahse, network țhat tawk loh avang leh hmanrua neih țhat tawk loh avangtein zirlaiten an thiam tur ang an thiam fumfe loh pal thei tih a sawi a.  A dan pangaia Sikul hawn a ni thei leh ta hlauh chu School Education lama thuneitute duhthusam tihhlawhtlinna a ni a, an lawm tak zet tih a sawi a ni.

Zirna boruak țha a awm leh thuai theih na turin  zirtirtute hmalakpui turin khawtlang hruaitute a sawm a, nu leh pate pawh inchhung lama țan la țheuh turin a sawm a ni.