47/2022-2023
Khawzawl, the 5th April, 2022: Vawiin chawhma dar 11 khan Khawzawl District Level Fire Prevention Committee chu an Chairman Pu C.C. Lalchhuangkima, District Bawrhsap kaihhruaina hnuaiah kangmei ven kawnga hmalakna hrang hrangte thlirletna neiin an thukhawm.

Pu C.C. Lalchhuangkima chuan kumin kangmei hluar zual hun chhunga kangmei a chhuak tam lo chu lawmawm a tih thu sawiin, District Level Fire Prevention Committee member, Village Council, YMA leh NGO hrang hrangte thahnemngaihna leh thawhhona chu fakawm a tih thu a sawi a. Fur ruahtui tlak hma thlenga kangmei chhuak thei reng a nih avangin fimkhur chhunzawm zel a tul thu a sawi bawk.

He hunah hian Khawzawl District Level Fire Prevention Committee Member Secretary, Pu Samson Thanruma, DFO, Khawzawl Wildlife Division chuan report a pe a. Khawzawl District huamchhungah lo hal avanga ram kang zau zawng chu hectare 1,489 vel a nih thu sawiin, tun thlenga record-a a lan danin March ni 15 hnu lama lo hal an awm lova, khaw hrang hrangin sorkar thupek an zawm tha thawkhat niin a sawi. Lo hal piahlama ram tikang palh khaw 3 an awm thu leh ram kang zau zawng chu hectare 2 vel a nih thu a tarlang a. Khawzawl Wildlife Division hnuaia Lengteng Wildlife Sanctuary leh Murlen National Park chu kangmei lakah a him thu a sawi bawk.

Vawiin meeting-ah hian kangmei ven kawnga Department hrang hrang hmalaknate thlirho a ni a, ruahtui tlak hma chuan theihtawp chhuah chhunzawm zel a tul avangin kangmei tichhuak lo tur leh fimkhur tura inzirtirna kalpui zel ni se tih a ni.