46/2022-2023
Champhai, the 5th April, 2022: Vawiin khan Champhai District Bawrhsap thar Pu James Lalrinchhana, MCS chuan MJA Champhai District Member-te chu lengah sawmin DC Conference Hall-ah inhmelhriattirna leh inkawmna hun a hmanpui.

Bawrhsap hi Pu Lalnunfela Chawngthu SDO Sadar, Dr. Lallawmkima DIPRO, Pi R. Lalnunkimi DUDO, Pi Esther Leihang DLAO leh Pu Obed Lalmalsawma SDC ten an tawiawm a. MJA Member-te hi Vice President Pu Lalhlupuia'n a hova, Champhai District hmasawnna tura hmalakna hrang hrangte leh hmachhawpte inpawhtlang taka sawiho a ni.

Pu James Lalrinchhana chuan Bawrhsap mawhphurhna a lak hnu reilotea Chanchinbumite nena inkawmhona hun tha tak buatsaih a ni thei chu lawmawm a tih thu sawiin, District nihphung hrechiang leh tawnhriat ngah tawh takte finchhuahna leh tawiawmna a mamawh dawn thu a sawi a. District hmellanna leh hmalaknate a tul ang zela phochhuaktu Media-te chuan District inrelbawlna leh mipui zirtir kawngah mawhphurhna lian tak an nei a ni, a ti a. Editorial tha tak tak leh zirbingna hmanga chachinthar mipuite hnena thlen thin chuan mipui sukthlek thui takin a herdanglam thei a ni, a ti bawk.

Tun dinhmunah mipuite rilru sukthlek siam dik kawngah theihtawp chhuah a pawimawh thu sawiin, "Rilru, taksa leh thlarau siam dikna lam hawi zawnga District siamthat chu thil tih makmawh a ni a, fuke kima hmasawnna a awm chauhin hmasawnna ngelnghet leh tluantling a awm thei a ni," a ti a. Champhai chu a post hmasak berna hmun a nih thu te, a mikhual loh thu leh thil tam tak a zirchhuahna hmun a nih thu te a tarlang a. District chhunga Department hrang hrang 67 te chakna, tanlak ngaihna leh hmachhawpte zirchiana hmalak tum a nih thu leh, tanrualna leh thawhhona tha tak nen District hmasawnna hmuh ngei a beisei thu a sawi a. District pawna awmte pawhin Champhai District chanchinthar ber ber leh hlawhtlinna an lo thlira an hriat ve theih nana thahnemngai taka hma la chhunzawm zel thin turin a fuih a. Champhai District leh a chhunga chengte tihhmasawn kawnga theihtawp chhuahpuiah a sawm nghal bawk a ni.

Dr.Lallawmkima, DIPRO Champhai hnen atangin Champhai District chhunga Media-te chanchin tlangpui leh hnathawh hrang hrangte ngaihthlak niin, Chanchinbumiten sawrkar tha taka an tawiawm thin thu leh thawhhona tha tak an neih thu a sawi a ni.

Pawl aiawha thusawitu Champhai District MJA Vice President Pu Lalhlupuia chuan MJA Champhai District chuan mipuite kawng dika kaihhruai leh Sawrkar khalh ngil leh finchhuah kawngah theihtawp a chhuah thin thu a sawi a. Bawrhsap thar lakah District mipuiten beiseina sang tak an neih thu leh a awm chhunga Champhai District tana thil hriatreng tlak hnutchhiah tum tura an beisei thu a sawi a. Champhai District tihhmasawn leh tihchangtlung kawngah theihtawp chhuaha tawiawm tlat an tum thu a sawi bawk a ni.

Deputy Commissioner thar chuan MJA member-te atanga Champhai District hmasawnna kawnga tul leh hmabak awmte, District tana kalphung tha zawk tur ni a hriat thlente chu ngaihthlak sakin, mamawh leh rawtna thlente chu lo zirchianga a tul ang zela bawhzui a nih tur thu a hrilh a ni.

Tun dinhmunah MJA Champhai District hnuaiah hian member 14 an awm mek a, heng zinga 11 te hi Champhaiah awmin Khawzawlah 3 an awm bawk a, MJA Champhai District huamchhungah hian nitin chanchinbu chhuak 5 leh Local Cable TV 2 an awm mek a ni.