45/2022-2023
Lunglei the 5th April, 2022 : Vawiin khan Electric Veng Community Hall, Hnahthialah bialtu MLA leh Health Minister ni bawk, Dr R Lalthangliana hovin Sanitary Napkin Vending Machine leh Incinerator semna hun hman a ni.

He hunah hian Principal Director H&FW Dr F. Lallianhlira, Hnahthial DC Pu R. Lalremsanga leh official dangte bakah Hnahthial District MJA hruaitute, khawtlang hruaitute, school zirtirtu leh zirlaite leh sawm bik dangte an tel a ni

Dr R Lalthangliana chuan hmasawnna daih rei leh tlo nei turin zirna, faina leh hriselna lama hmasawn chu thil pawimawh hmasa berte zing ami a ni tiin hemi kawnga hmanraw pawimawh tak Sanitary Napkin Vending Machine leh Incinerator te zirlaite tana ruamhan sak tu Samagra Siksha chungah lawmthu a sawi a. Faina leh hriselna kawngah Mizote pawhin hmasawnna tur tam tak kanla nei a ni tiin taksa insawizawi, ei leh in uluk, zuk leh hmuam laka insum, kan chenna leh hnathawhna hmun te enkawl fai, khawtlang zun in enkawl fai kawngah te tan kan lak tlan a tul takzet a ni, a ti a. Ram leh hnam hmasawn zelna turin mitinten mahni zawn theuhah kan theih ang tawkin midang tana luanchhuah kan tum theuh a pawimawh takzet a ni, a ti bawk.

A sawi zelnaah Health & Family Welfare Minister chuan mipuite mamawh tak tak hrechiang turin Department hrang hrangte inpawh tlang taka hma an lak ho a tul a ni tiin Department aiawh official kalkhawmte chu a theih angin an scheme neihte inti chak tawna kalkawp tira (convergence) hma la tlang turin a chah a. A Department enkawlte pawh Department dangte nena hma la tlang tura an inhawn reng thu a sawi bawk a ni.

He huna khualzahawm Hnahthial Bawrhsap Pu R. Lalremsanga pawhin thu sawiin thalaite hriselna ngai pawimawha an tan scheme tha tak buatsaih sak tu Samagra Siksha chungah lawmthu sawiin khawl te chu a dawngtu school te leh mipuiten neitu rilru pu chunga uluk taka enkawl turin a chah a. Hnahthial District kawng hrang hranga hmasawn zelna turin faina leh zirna lama hmasawn leh zuk leh hmuam dona kawnga ngawrh taka hmalak a ngaih pawimawh hmasak thu sawiin District Bawrhsap chuan District mipuite, kohhrante, tlawmngai pawl, khawtlang hruaitute leh Department- te theihtawp chhuaha hmalak puiah a sawm.

Pu Micky R Lalenkawla, DEO & DPC, Samagra Shiksha, Hnahthial District chuan he scheme chungchang sawifiahna hun hmangin Samagra Siksha hnuaia naupang hriselna leh faina kawnga hmalakna - Equity Intervention, Adolescent Health and Hygiene scheme kaltlanga kalpui anih thu a tarlang a. Vawiina Sanitary Napkin Vending Machine semchhuah te hi pad 50 lenna khawl niin Hnahthial District chhunga school 31 te hnenah hlan an ni a. Khawl hi pawisa thir hmang niin pad pakhat hi cheng khat thir hmangin a lak chhuah thei a ni. Sanitary napkin te hi a thlawna pek chhuah a nih theihnan Samagra Siksha hotute chuab sawrkar laipui hotute hnenah an thlen mek thu Pu Mickey R Lalenkawla chuan a sawi a. Hmeichhe zirlai 50 aia tam awmna school ah te pad 100 lenna khawl la sem leh tum anih thu leh Mizoram pumah Vending machine 817 pek chhuah tum anih thu a report bawk.